ပြင်းထန်​နေဆဲ ဖားဆောင်းတိုက်ပွဲ

ရဲ​ခေါင်/People’s Spring

ကရင်နီပြည်နယ်မှာဒေသကွပ်ကဲရေးစစ်ဌာနချုပ်အပါအဝင် အာဏာသိမ်းစစ်တပ်အခြေစိုက် တပ်ရင်း ၂၀ ကျော်ရှိပါတယ်။

အဲဒီထဲကအမှတ်(၁၃၄)ခြေလျင်တပ်ရင်း(ခလရ၁၃၄) နဲ့ အမှတ် ၁၃၅ ခြေလျင်တပ်ရင်း(ခလရ ၁၃၅)ကဖားဆောင်းမြို့နယ်ထဲမှာရှိပါတယ်။

ခလရ (၁၃၄ )တပ်ရင်းကို ကရင်နီတပ်ပေါင်းစုံစစ်ဦးစီးအဖွဲ့ -JCS က ၂၀၂၅ ခုနှစ် ဇွန် ၃၀ ရက်က ထိုးစစ်ဆင်သိမ်းပိုက်ခဲ့ပါတယ်။ကရင်နီပြည်နယ်ထဲက စစ်တပ်အခိုင်အမာတပ်စွဲထားတဲ့ ​ခြေလျင်တပ်ရင်းတစ်ခုကို ပထမဆုံးသိမ်းပိုက်ခဲ့မှုလည်းဖြစ်ပါတယ်။အဲဒီတိုက်ပွဲမှာ စစ်တပ်ရဲ့တိုက်​လေယာဥ်တစ်စီးကိုပါ ကရင်နီ​တော်လှန်​ရေးတပ်​တွေက ပစ်ချဖျက်ဆီးနိုင်ခဲ့ပါတယ်။

ခလရ (၁၃၄) ဟာ ဖားဆောင်းမြို့အနောက်ခြမ်း ရေထွက်ပေါက်နားမှာရှိပြီး မြို့တောင်ဘက်ခြမ်းက ဖားဆောင်း-မော်ချီး လမ်းပိုင်းမှာခလရ (၁၃၅) ရှိပါတယ်။

တပ်ရင်း နှစ်ခုဟာ ဘောလုံးကွင်းသုံးကွင်းကျော်စာသာ ကွာဝေးပေမယ့် ခံကတုတ်၊ကာကင်းတွေနဲ့ မိုင်းတွေကိုခင်းထားတာ၊လေကြောင်းကနေ ရိက္ခာ၊ခဲယမ်းဖြည့်တင်းတာတွေဆက်တိုက်လုပ်ခဲ့တယ်လို့ ​တော်လှန်​ရေးတပ်​တွေက​ပြောပါတယ်။

ဒါကြောင့်လည်း လက်ကျန်တဲ့ ဖြစ်တဲ့ခလရ(၁၃၅) တပ်ရင်းကို ကရင်နီပူးပေါင်းတပ်တွေ ခုနှစ်လကျော်ကြာ ပိတ်ဆို့ခဲ့ပေမယ့် မသိမ်းနိုင်ခဲ့ပါဘူး။

တစ်ဖက်မှာ စစ်တပ်က ကရင်နီပြည်နယ်နဲ့ ပြည် နယ်အစပ်က တော်လှန်ရေးအင်အားစုတွေ ထိန်း ချုပ်ထားတဲ့ ဖယ်ခုံ ၊မိုးဗြဲ၊လွိုင်ကော်၊ဒီးမော့ဆို၊ဘောလခဲမြို့နယ်တွေထဲက စစ်စခန်း တွေကို ၂၀၂၅ ကစပြီးဆက်တိုက် တန်ပြန်ထိုးစစ်ဆင်ပြီးပြန်လည်ထိန်းချုပ်နိုင်ခဲ့ပါတယ်။

အဲဒီနောက် ဘောလခဲမြို့နယ်ကနေ စစ်ကြောင်းသုံးခု(အင်အား ၅၀၀ ဝန်းကျင်) နဲ့ ပြီးခဲ့တဲ့ နှစ် နိုဝင်ဘာလကစပြီး ဖားဆောင်းမြို့နယ်ထဲဝင်ဖို့ စစ်တပ်ကအကြိမ်ကြိမ် ကြိုးစားခဲ့ပါတယ်။

ကနဦးအနေနဲ့ ဖရူဆို- ထားလဲ -နန်းဖဲ – ဘောလခဲနဲ့ ဘောလခဲ-ထူးချောင်း-ဖားဆောင်း လမ်းမကြီးကို စစ်တပ်ကစိုးမိုးမှုပြန်ယူခဲ့ပြီး အဲဒီကနေတဆင့်ဖားဆောင်းထဲကို စစ်ကြောင်းတွေ အလုံးအရင်း နဲ့ ​ဖေ​ဖော်ဝါရီလဆန်းပိုင်းမှာ တိုးဝင်လာနိုင်တာ ဖြစ်ပါတယ်။

စစ်တပ်က ဖားဆောင်းမြို့ကို ထိုးစစ်ဆင်မှုတွေ နဲ့ မြေပြင်စစ်ရေးအချက်အလက်တွေအရ ခလရ (၁၃၄) ကိုပြန်ထိန်းချုပ်နိုင်ဖို့ ၊ခလရ(၁၃၅)ကို စစ်ကူပို့ပြီး ​ခြေကုပ်ခိုင်မာ​အောင်လုပ်ဖို့နဲ့ ဖားဆောင်း(သံလွင်မြစ်ကူး)တံတားကို ထိန်းချုပ်ဖို့ ရည်ရွယ်တယ်လို့ စစ်​ရေးသတင်းရင်းမြစ်အချို့က​ပြောပါတယ်။

စစ်တပ်ကဖားဆောင်းမြို့ကအစိုးရရုံးတွေ နဲ့ ဖားဆောင်း မြို့ကို ပြန်ရပြီလို့ ဖေဖော်ဝါရီ ၁၅ ရက်မှာ ထုတ်ပြန်ထားပါတယ်။အဲဒီထုတ်ပြန်ချက်မှာ ဖားဆောင်းမြို့တွင်းကို ဝင်နိုင်မယ့် လမ်းနှစ်သွယ်ထဲက ပါပု နဲ့ နန့်ကစ် ရွာ နှစ်ရွာ က စစ်ကြောင်းတွေ ထိုးဖောက်ဝင်ရောက်ခဲ့တာလို့ ဆိုထားပါတယ်။

“ ဘောလခဲကနေ ဖားဆောင်းကို စစ်ကြောင်းသုံး ကြောင်းနဲ့ ထိုးလာတယ်။ထိုးလာတဲ့အချိန်မှာ ပါပုကစစ်ကြောင်းက ၁၃၅ တပ်ထဲကို ၂၀ လောက်ဝင်သွားနိုင်တယ်။ဘယ်နေ့ကလည်း ဆိုတော့ (​ဖေ​ဖော်ဝါရီ ) ၁၂ ရက်နေ့ညက ။ဝင်တဲ့အချိန်မှာလမ်းတစ်​လျှောက်မှာရှိတဲ့ အစိုးရရုံးတွေနဲ့ ဓာတ်ပုံရိုက်လာတယ်။၁၃၅ ထဲရောက်တဲ့အချိန်မှာ ဝါဒဖြန့်တာမျိုး။အကုန်လုံးရောက်တာ မဟုတ်ဘူး။ကျန်တဲ့လမ်းကြောင်းကစစ်ကြောင်းတွေကအထဲကိုမရောက်သေးဘူး” လို့ မြေပြင်မှာတိုက်ပွဲဝင်​နေတဲ့ရဲဘော်တစ်ဦးက ပြောပါတယ်။

ဒါ့အပြင် ​ဖေ​ဖော်ဝါရီ ၁၇ ရက်အထိ မြေပြင်စစ်ရေးအရ ခလရ (၁၃၅) တပ်ထဲမှာပဲ စစ်တပ်က စုစည်းနေဆဲ ဖြစ်ပြီး ဒရုန်း၊လက်နက်ကြီး နဲ့လေကြောင်းကိုအများအပြားသုံးနေတယ်လို့ အသိပေးပါတယ်။

စစ်ရေးအရအရေးပါတဲ့ဖားဆောင်း(သံလွင်တံတား)ဘက်ခြမ်းကိုလည်း စစ်တပ်ဘက်ကနေ့စဥ် ပစ်ခတ်မှုတွေ ရှိတယ်လို့ သိရပါတယ်။

ဖားဆောင်း(သံလွင်တံတား)ဟာ စစ်တပ်တပ်စွဲထားတဲ့ ခလရ ၁၃၅ တပ်နဲ့ နှစ်မိုင်ဝန်းကျင်အကွာမှာရှိပြီး ကရင်နီတပ်ပေါင်းစုကအလုံးစုံထိန်းချုပ်ထားတဲ့ မယ်စဲ့မြို့နယ် နဲ့ ချိတ်ဆက်ထားတာဖြစ်ပါတယ်။

​ဖေ​ဖော်ဝါရီ ၁၇ က်​နေ့မနက်အ​စောပိုင်းမှာ ဖားဆောင်း(သံလွင်တံတား)ရဲ့ ဖားဆောင်းမြို့ဘက်အခြမ်းဟာမိုင်းခွဲခံခဲ့ရပါတယ်။ဘယ်အဖွဲ့အစည်းကလုပ်တယ်ဆိုတာကိုတော့ မသိရသေးပါဘူး။

တိုက်ပွဲ​တွေပြင်းထန်​နေတာ​ကြောင့်မယ်စဲ့ကနေ ဖားဆောင်းကို စစ်ကူလာမယ့် ကရင်နီတပ်တွေကို ဟန့်တားချင်တာ (ဒါမှမဟုတ်) ဖားဆောင်း ကနေ မယ်စဲ့ ဘက်ကို စစ်တပ် အလွယ်တကူဖြတ်ကူးမလာနိုင်​အောင် ဖြတ်တောက်လိုက်တာ စတဲ့သုံးသပ်မှုမျိုးတွေရှိ​နေကြတာ​တွေ့ရပါတယ်။

ဖားဆောင်း နဲ့ မယ်စဲ့မြို့နယ်ကို ဆက်သွယ်ထားပြီး ပေ ၁၂၀၀ ကျော်ရှိတဲ့ ဖားဆောင်းတံတား ပျက်စီးမှုက ဖားဆောင်းမြို့နယ်ဘက်ခြမ်းမှာ ဖြစ်ပွားခဲ့တာပါ။

“ အတိအကျတော့ သုံးသပ်လို့ မရဘူး။စစ်တပ်ဘက်ကလည်း မယ်စဲ့ ဘက်က စစ်ကူတွေလာလို့မရအောင် ဟန့်တာချင်တဲ့အခြေအနေဖြစ်နိုင်သလို နောက်တခုက တော်လှန်ရေးအင်အားစုတွေဘက်ကလည်း ဖားဆောင်းအရှေ့ခြမ်းကို မလာနိုင်အောင် လုပ်လာတာလည်းဖြစ်မယ်” လို့ ကရင်နီ စစ်ရေးသတင်းရင်းမြစ်က လူထုနွေဦးကို ပြောပါတယ်။

လက်ရှိမှာစစ်သားအချို့ကဖားဆောင်းမြို့တွင်းကို ဝင်ရောက်ပြီး ခလရ (၁၃၅)ကိုသွားပူး​ပေါင်းခဲ့သလို တိုက်ပွဲတွေဆက်ဖြစ်နေတယ်လို့ မြေပြင်ရဲဘော်အချို့က အသိပေးပါတယ်။

တံတားဖျက်ဆီးခံရတာက စစ်ရေးအစိတ်အပိုင်းတစ်ခုပဲ ဖြစ်ပြီး ဖားဆောင်းမြို့နယ်ကို စစ်တပ်ကထိန်းချုပ်နိုင်ခဲ့ရင် ကရင်နီတပ်ပေါင်းစုရဲ့အလုံးစုံထိန်းချုပ်ထားတဲ့ မြန်မာ-ထိုင်းနယ်စပ်က မယ်စဲ့မြို့နယ်အတွက်လည်း စစ်ရေးအရ အချိန်မရွေး ခြိမ်းခြောက်ခံရနိုင်တယ်ဆိုတဲ့ ကရင်နီစစ်ရေးစောင့်ကြည့်သူအချို့က သုံးသပ်ပါတယ်။

ဖေဖော်ဝါရီ ၁၇ ရက်ညနေပိုင်းအထိ ဖားဆောင်းမြို့အနီးတဝိုက်မှာ တိုက်ပွဲတွေ ပြင်းထန်​နေဆဲဖြစ်ပြီးစစ်တပ်က လေကြောင်းကနေ ဗုံးကြဲတာ၊ လက်နက်ကြီးပစ်ခတ်မှုတွေ ရှိနေဆဲလို့ တိုက်ပွဲဝင်​နေတဲ့ရဲဘော်တချို့က ​ပြောပါတယ်။ဒါ​ကြောင့်စစ်တပ်က ဖား​ဆောင်းမြို့၊တပ်ရင်း​တွေနဲ့ အနီး ဝန်းကျင်ကိုထိန်းချုပ်နိုင်ပြီလို့ ဆက်တိုက်​ပြော​နေ​ပေမယ့် ​မြေပြင်မှာ တိုက်ပွဲ​တွေပြင်းထန်​နေဆဲဖြစ်ပါတယ်။

“ ရက်​ပိုင်းလောက်ဆိုအဖြေတခုပေါ်ပါလိမ့်မယ်” လို့ ဖားဆောင်းမြို့တိုက်ပွဲမှာ စစ်တပ်ကို ခုခံတိုက်ခိုက်နေတဲ့ကယန်းအမျိုးသားတပ်မတော်-KNA ရဲ့ပြောရေးဆိုခွင့်ရှိသူ ခွန်းဆောင်ဒူကပြောပါတယ်။ ။