မေ ၁၉၊ ၂၀၂၆။ မေရီ/People’s Spring
ရှမ်းပြည်နယ်၊ ဓနုကိုယ်ပိုင်အုပ်ချုပ်ခွင့်ရဒေသ၊ ရွာငံမြို့နယ်မှာ သဲကျင်းပြိုကျမှုကြောင့် ပိတ်မိနေသူ ၃ ဦးအနက် ၂ ဦးသေဆုံးပြီး အမျိုးသား ၁ဦးကိုတော့ ဘဝတူ လုပ်သားတွေက အသက်ရှင်လျက် ကယ်ဆယ်နိုင်ခဲ့ပါတယ်။
ပြီးခဲ့တဲ့ မေလ ၁၇ ရက် မနက် ၁၁ နာရီခွဲခန့်က ရွာငံမြို့နယ်၊ ယကြီးကျေးရွာအနီးရှိ ကျောက်သဲကျင်းပြိုကျမှုဖြစ်ပွားပြီး ကျောက်သဲတူးနေသူ အမျိုးသား ၃ ဦး ပိမိခဲ့ကြောင်း ဒေသခံတွေက ပြောပါတယ်။
“ ပွေးပြတ်ရွာစပ်က သဲတွင်းပြိုကြတာ။ လူသုံးယောက်နဲ့ သဲတင် စက်တစ်စီးပါသွားတယ်။ ပိတာကတော့ ယကြီးရွာကပဲ။ ယကြီးရွာခံက တစ်ယောက်။ ကျန်တဲ့နှစ်ယောက်က အိမ်ထောင်ကျလို့ ရောက်လာတဲ့ အပြင်ရွာသားတွေပါ” လို့ ဒေသခံတစ်ဦးက ပြောပါတယ်။
Public Service Announcement
အဲဒီနောက် သဲကျင်းလုပ်သားတွေနဲ့ နီးစပ်ရာကျေးရွာဒေသခံတွေက သဲတွေကို တူးဖော်ခဲ့ကြရာမှာ အမျိုးသားတစ်ဦးကိုတော့ အသက်ရှင်လျက် ကယ်ဆယ်နိုင်ခဲ့ကြောင်း ဒေသခံတွေက ပြောပါတယ်။ ကျန် အမျိုးသားနှစ်ဦးကိုတော့ အသက်သေဆုံးနေတဲ့ရုပ်အလောင်းတွေကိုသာ ထုတ်ယူနိုင်ခဲ့တယ်လို့ သိရပါတယ်။
