မောင်မင်းမော်၊ ဇန်ဝါရီ-၁၄
မန္တလေးမြို့ အရိုးအထူးကုဆေးရုံမှ ဆေးရုံအုပ်ကြီးအား အဂတိလိုက်စားမှုဖြင့် ဖမ်းဆီးအမှုဖွင့်ထားမှုနှင့် ပတ်သက်၍ ဇန်နဝါရီ(၁၃)ရက်က တိုင်းတရားလွှတ်တော်သို့ တရားစွဲဆို တင်ပို့ခဲ့ကြောင်း အဂတိလိုက်စားမှု တိုက်ဖျက်ရေးကော်မရှင် စစ်ဆေးရေးမှူး ဦးအောင်မြင့်ထွန်းက Mandalay In-depth News အား ပြောသည်။
မန္တလေးမြို့ ကုတင်(၅၀၀)ဆံ့ အရိုးအထူးကုဆေးရုံကြီးမှ ဆေးရုံအုပ်ကြီး ဒေါက်တာကြည်လွင်နှင့် ဌာနခွဲစာရေး ဦးအောင်ကျော်ဦး တို့သည် ရာထူးတာဝန်ကို အလွဲသုံးစားပြုလုပ်၍ အဂတိလိုက်စားမှု ကျူးလွန်ခဲ့သည်ဟုဆိုကာ မြန်မာနိုင်ငံ အဂတိလိုက်စားမှု တိုက်ဖျက်ရေးကော်မရှင်က တရားလိုပြုလုပ်၍ ပြီးခဲ့သည့် ၂၀၁၉ ဒီဇင်ဘာ(၂၀)ရက်က မန္တလေးမြို့ ချမ်းအေးသာစံမြို့နယ် အမှတ်(၁၁) နယ်မြေရဲစခန်း၌ အမှုဖွင့်ခဲ့သည်။
ဆေးရုံအုပ်ကြီး ဒေါက်တာကြည်လွင်ကို အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၆ ဖြင့် အရလည်းကောင်း၊ ဌာနခွဲစာရေး ဦးအောင်ကျော်ဦးကို အဂတိလိုက်စားမှု တိုက်ဖျက်ရေး ဥပဒေ ပုဒ်မ ၅၇ အရ လည်းကောင်း အမှုဖွင့်ဖမ်းဆီးထားခြင်း ဖြစ်သည်။
အဆိုပါအမှုနှင့်ပတ်သက်၍ ဆေးရုံအုပ်ကြီး ဒေါက်တာကြည်လွင်ကို ဇန်နဝါရီ(၁၃)ရက်က တိုင်းတရားရုံးသို့ တရားစွဲဆို တင်ပို့ခဲ့ရာ တရားရုံးမှ လက်ခံခဲ့ကြောင်း ၎င်းက ပြောသည်။
“ကျွန်တော်တို့ တင်ပြတဲ့ အထောက်အထား စာရွက်စာတမ်းတွေ စီစစ်ပြီးတော့ အမှုတွဲကို လက်ခံလိုက်တာပါ”ဟု ဦးအောင်မြင့်ထွန်းက ပြောသည်။
အဆိုပါ အမှုအား ဆက်လက်စစ်ဆေးရန် ဇန်နဝါရီ(၂၁)ရက်တွင် ရုံးချိန်းခေါ်ယူထားကြောင်း ၎င်းက ဆိုသည်။
အဂတိလိုက်စားမှု ကျူးလွန်ကြောင်း တိုင်ကြားစာနှင့်ပတ်သက်၍ ကော်မရှင်က စုံစမ်းစစ်ဆေးခဲ့ရာ မန္တလေးမြို့ ကုတင်(၅၀၀)ဆံ့ အရိုးအထူးကု ဆေးရုံကြီးမှ ဆေးရုံအုပ်ကြီး ဒေါက်တာကြည်လွင်သည် ဆေးရုံဝင်းအတွင်း ယာဉ်ရပ်နားခ ကောက်ခံရေးလုပ်ငန်း တင်ဒါခေါ်ယူခြင်းနှင့် ပတ်သက်၍ တင်ဒါရရှိအောင် ဆောင်ရွက်ပေးမည်ဟု ဆိုကာ ၂၀၁၇-၂၀၁၈ဘဏ္ဍာနှစ်နှင့် ၂၀၁၈-၂၀၁၉ ဘဏ္ဍာနှစ်တို့တွင် တင်ဒါရရှိရေးအတွက် လုပ်ငန်းရှင် နှစ်ဦးထံမှ ငွေကျပ် သိန်း(၆၀)ကိုလည်းကောင်း၊ ၂၀၁၉-၂၀၂၀နှင့် ၂၀၂၀-၂၀၂၁ ဘဏ္ဍာနှစ်တို့တွင် တင်ဒါရရှိရေးအတွက် လုပ်ငန်းရှင် နှစ်ဦးထံမှ ငွေကျပ် သိန်း(၈၀)ကို လည်းကောင်း၊ စုစုပေါင်း ငွေကျပ်သိန်း(၁၄၀) လက်ခံရယူခဲ့ကြောင်း စစ်ဆေးပေါ်ပေါက်ခဲ့သည်ဟု အဂတိလိုက် စားမှုတိုက်ဖျက်ရေးကော်မရှင်က သတင်းထုတ်ပြန်ထားသည်။
ထို့အပြင် ဌာနခွဲစာရေး ဦးအောင်ကျော်ဦး (ယခု ဦးစီးအရာရှိ (အုပ်ချုပ်/စီမံ)၊ မန္တလေးတိုင်းဒေသကြီး ကုသရေးဦးစီးဌာန) သည်လည်း အရိုးအထူးကုဆေးရုံကြီး ဝင်းအတွင်း စက်ဘီး၊ဆိုင်ကယ် အပ်နှံခ ကောက်ခံခြင်း လုပ်ငန်းနေရာနှစ်ခုအတွက် ၂၀၁၇-၂၀၁၉ ခုနှစ် တင်ဒါရရှိရေး ကူညီဆောင်ရွက်ပေးမည်ဟု ဆိုကာ ငွေကျပ် (၂)သိန်းကို လည်းကောင်း၊ တင်ဒါကော်မတီဝင်များအား ကန်တော့ရန်ဟုဆိုကာ ငွေကျပ်(၃)သိန်းကို လည်းကောင်း၊ တင်ဒါအောင်မြင်သူထံမှ ငွေကျပ် (၇)သိန်းခန့်တန်ဖိုးရှိ Camera နှင့် Laptop တို့ကိုလည်းကောင်း တံစိုးလက်ဆောင်အဖြစ် လက်ခံရယူခဲ့ကြောင်း စစ်ဆေးပေါ်ပေါက်ခဲ့သည်ဟု အဂတိကော်မရှင်၏ ၂၀၁၉ ဒီဇင်ဘာ(၂၀)ရက် ထုတ်ပြန်ချက်တွင် ဖော်ပြထားသည်။
