မောင်မင်းမော်၊ ဒီဇင်ဘာ-၂၈
အနောက်တိုင်း ခရီးသွားများ မြန်မာနိုင်ငံသို့ ပိုမိုလာရောက် လည်ပတ်စေရန်အတွက် ဥရောပ(၅)နိုင်ငံကို ဇန်နဝါရီ(၁)ရက်မှစတင်ကာ ဆိုက်ရောက်ဗီဇာ ထုတ်ပေးမည်ဖြစ်ကြောင်း ဟိုတယ်နှင့် ခရီးသွားလာရေး ဝန်ကြီးဌာနက သတင်းထုတ်ပြန်သည်။
မြန်မာနိုင်ငံသို့ လာရောက်လည်ပတ်မည့် သြစတြီးယား၊ ချက်၊ ဟန်ဂေရီ၊ လူဇင်ဘတ်နှင့် နယူးဇီလန်နိုင်ငံမှ ကမ္ဘာလှည့်ခရီးသွားများကို မန္တလေး၊ ရန်ကုန်နှင့် နေပြည်တော်လေဆိပ်တို့တွင် ဇန်နဝါရီ(၁)ရက်မှစတင်ကာ ဆိုက်ရောက်ဗီဇာ ခွင့်ပြုပေးမည်ဖြစ်သည်ဟု ဟိုတယ်နှင့် ခရီးသွားလာရေး ဝန်ကြီးဌာန၏ သတင်းထုတ်ပြန်ချက်တွင် ဖော်ပြသည်။
ဆိုက်ရောက်ဗီဇာဖြင့် လည်ပတ်ခွင့်ကို စမ်းသပ်ကာလ သုံးနှစ်သတ်မှတ်ထားပြီး ဗီဇာကြေး အမေရိကန်ဒေါ်လာ (၅၀)ကောက်ခံကာ ရက်(၃၀) နေထိုင်ခွင့်ပြုမည် ဖြစ်သည်။ ဆိုက်ရောက်ဗီဇာပေးခြင်းကို သာမန် နိုင်ငံကူးလက်မှတ်ကိုင်ဆောင်ပြီး အလည်အပတ် ရည်ရွယ်ချက်ဖြင့် ဝင်ရောက်လာမည့်သူများကိုသာ ခွင့်ပြုမည်ဖြစ်ပြီး နေခွင့်သက်တမ်းတိုး လျှောက်ထားခြင်းကိုမူ ခွင့်ပြုမည်မဟုတ်ဟု ထုတ်ပြန်ထားသည်။
ဆိုက်ရောက်ဗီဇာ ခွင့်ပြုပေးခြင်းကို ခရီးသွားလုပ်ငန်းနှင့် သက်ဆိုင်သည့် ဌာနဆိုင်ရာများ၊ အဖွဲ့အစည်များနှင့် ပူးပေါင်းကာ ဆောင်ရွက်ခြင်းဖြစ်ပြီး မြန်မာနိုင်ငံအတွက် အကျိုးရှိစေမည့် ငွေကြေးပိုမိုသုံးစွဲသည့် နိုင်ငံများကို ရွေးချယ်ခွင့်ပြုခြင်းဖြစ်ကြောင်း ဟိုတယ်နှင့် ခရီးသွား ညွှန်ကြားမှုဦးစီးဌာန မန္တလေးတိုင်းဒေသကြီး လက်ထောက်ညွှန်ကြားရေးမှူး ဦးစန်းယုက ပြောသည်။
“ကျွန်တော်တို့ကတော့ အနောက်တိုင်း ခရီးသွားဧည့်သည်တွေ ယခင်ထက် ပိုမိုဝက်ရောက်လာဖို့ မျှော်မှန်းပြီးတော့မှ လုပ်ဆောင်ခြင်း ဖြစ်ပါတယ်” ဟု ဦးစန်းယုက Mandalay In-depth News အား ပြောသည်။
ဆိုက်ရောက်ဗီဇာပေးခြင်းကြောင့် အနောက်နိုင်ငံမှ ခရီးသွားများ ပိုမိုဝင်ရောက်လာပါက ၎င်းတို့အတွက် သွားလာနေထိုင်မှုများ လွယ်ကူချောမွေ့စေရန် ဝန်ကြီးဌာနအနေဖြင့် ကြိုတင်ပြင်ဆင်မှုများလည်း ပြုလုပ်ထားသည်ဟု ၎င်းက ဆိုသည်။
မြန်မာနိုင်ငံသို့ အနောက်နိုင်ငံမှ ကမ္ဘာလှည့်ခရီးသွားဧည့်သည်များ ပိုမိုဝင်ရောက်လာစေရန်အတွက် ယခုနှစ် အောက်တိုဘာ(၁)ရက်က စတင်ကာ ဥရောပခြောက်နိုင်ငံဖြစ်သည့် အီတလီ၊ ဩစတြေးလျ၊ ဂျာမနီ၊ ရုရှား၊ စပိန်၊ ဆွစ်ဇာလန်နိုင်ငံတို့ကိုလည်း ဟိုတယ်နှင့် ခရီးသွားလာရေး ဝန်ကြီးဌာနက ဆိုက်ရောက်ဗီဇာ ခွင့်ပြုပေးခဲ့သည်။
ဆိုက်ရောက်ဗီဇာ ပေးခြင်းကြောင့် မြန်မာနိုင်ငံကို ကမ္ဘာက ပိုမိုသိရှိလာနိုင်ပြီး ခရီးသည် လာရောက်မှု မြင့်တက်လာနိုင်သည့်အတွက် ကြိုဆိုကြောင်း၊ သို့သော် လက်ရှိအခြေအနေအရ အနောက်တိုင်းခရီးသွားများ သိသိသာသာ ဝင်ရောက်လာမည်ဟု မမျှော်လင့်ကြောင်း မြန်မာနိုင်ငံ ခရီးသွားလုပ်ငန်းရှင်များအသင်း (မန္တလေးဇုံ) အတွင်းရေးမှူး ဦးသန့်ဇော်က ပြောသည်။
“ဒိလိုမျိုး လုပ်ပေးလိုက်တဲ့အပေါ်မှာကတော့ ခရီးသွားလုပ်ငန်းအတွက် အပြောင်းအလဲတခုပေါ့။ ကျွန်တော်တို့ အနေနဲ့ကြိုဆိုတယ်။ ဘယ်လောက်ထိ ပြောင်းလဲမလဲဆိုတာတော့ ပြောဖို့ခက်တာပေါ့။ တအားကြီးတော့ သိသိသာသာ ထောင်တက်သွားမှာမျိုးတော့ မထင်ဘူး”ဟု ၎င်းက ပြောသည်။
မြန်မာ့ ခရီးသွားကဏ္ဍ တိုးတက်စေရန် ဆိုက်ရောက်ဗီဇာ ပေးခြင်းအပြင် ခရီးစဉ်ဒေသများအား ကြော်ငြာခြင်း၊ ခရီးသွားရာသီ မဟုတ်သည့်ကာလများတွင် ဗီဇာကြေး လျော့ကောက်ခြင်း စသည်များလည်း လုပ်ဆောင်ရန် လိုအပ်မည်ဟု ဦးသန့်ဇော်က ပြောသည်။
၂၀၁၅ခုနှစ်က မြန်မာနိုင်ငံသို့ ခရီးသွားဧည့်သည် (၄)သန်းကျော် ဝင်ရောက်ခဲ့သော်လည်း ရခိုင်ပဋိပက္ခ ဖြစ်ပွားပြီးနောက်ပိုင်းတွင် အနောက်နိုင်ငံများမှ ခရီးသွားဧည့်သည် ဝင်ရောက်မှု သိသိသာသာ လျော့ကျခဲ့ကာ ခရီးသည် (၃)သန်းကျော်သာ လာရောက်လည်ပတ်မှု ရှိတော့သည်ဟု ဒီဇင်ဘာ(၁၀)ရက်က နေပြည် တော်တွင်ပြုလုပ်သည့် ပြည်သူ့လွှတ်တော် အစည်းအဝေးတွင် ဟိုတယ်နှင့် ခရီးသွား ဝန်ကြီးဌာန ဒု-ဝန်ကြီး ဦးတင်လတ်က ပြောသည်။
ခရီးသွားဧည့်သည် လာရောက်လည်ပတ်မှု မြင့်တက်စေရန် ဟိုတယ်နှင့် ခရီးသွား ဝန်ကြီးဌာနအနေဖြင့် ၂၀၁၈ အောက်တိုဘာမှစတင်ကာ ဗီဇာဆိုင်ရာ ဖြေလျှော့မှုများ ပြုလုပ်လျှက်ရှိသည်။
လက်ရှိတွင် အာရှနိုင်ငံများဖြစ်သည့် ဂျပန်၊ တောင်ကိုရီးယား၊ ဟောင်ကောင်နှင့် မကာအို တို့မှ ကမ္ဘာလှည့်ခရီးသွားများကို မြန်မာနိုင်ငံသို့ လာရောက်လည်ပတ်မည် ဆိုပါက ဗီဇာကင်းလွတ်ခွင့် ပြုထားပြီး လေကြောင်းဖြင့် လာရောက်သည့် တရုတ်နှင့် အိန္ဒိယနိုင်ငံသား ခရီးသွားများကိုလည်း ဆိုက်ရောက်ဗီဇာ ခွင့်ပြုပေးထားသည်။
ဟိုတယ်နှင့် ခရီးသွားလာရေးဝန်ကြိးဌာန၏ ထုတ်ပြန်ချက်များအရ ယခုနှစ် ဇန်နဝါရီမှ အောက်တိုဘာအထိ မြန်မာနိုင်ငံသို့ လာရောက်လည်ပတ်သည့် ခရီးသွားဧည့်သည် (၃)သန်းကျော် ရှိပြီး တရုတ်နိုင်ငံမှ (၆)သိန်းခန့်ဖြင့် လာရောက်မှု အများဆုံးဖြစ်သည်။
မန္တလေးသို့ လာရောက်လည်ပတ်သည့် ခရီးသွားဧည့်သည်များ / Photo – Mg Min Maw.