မောင်မင်းမော်၊ ဒီဇင်ဘာ-၈
သွေးကင်ဆာရောဂါကြောင့် ထိုင်းနိုင်ငံသို့ သွားရောက်ကာ ဆေးဝါးကုသမှု ခံယူနေရသည့် အမျိုးသားဒီမိုကရေစီ အဖွဲ့ချုပ်ပါတီ ဒု-ဥက္ကဌ၊ မန္တလေးတိုင်း ဝန်ကြီးချုပ် ဒေါက်တာဇော်မြင့်မောင် အနေဖြင့် မကြာမီရက်ပိုင်းအတွင်း ရာထူးတာဝန်များ ပြန်လည်ထမ်းဆောင်နိုင်တော့မည်ဖြစ်ကြောင်း မန္တလေးတိုင်း ခေတ္တဝန်ကြီးချုပ် ဦးဇာနည်အောင်က ပြောသည်။
“တို့က ကုသတဲ့ ဆရာဝန် မဟုတ်တော့ ရက်စွဲနဲ့အတိအကျ ပြောဖို့တော့ ခက်ပါတယ်။ သို့သော်လည်းပဲ ရက်ပိုင်းအတွင်း ဆရာပြန်ပြီးတော့ တာဝန်တွေကို ထမ်းဆောင်မယ်လို့ တို့တွေ ခန့်မှန်းလို့ရပါတယ်”ဟု ဦးဇာနည်အောင်က ပြောသည်။
အသက်(၆၈)နှစ်အရွယ် ဒေါက်တာဇော်မြင့်မောင်သည် ပြီးခဲ့သည့် အောက်တိုဘာ(၂၄)ရက် နောက်ပိုင်းကတည်းက ထိုင်းနိုင်ငံသို့ သွားရောက်ကာ ဆေးဝါးကုသမှု ခံယူနေရခြင်း ဖြစ်သည်။
ဒေါက်တာဇော်မြင့်မောင် အနေဖြင့် ပါတီနှင့် အစိုးရအဖွဲ့တွင် ရယူထားသည့် မူလရာထူး တာဝန်များ ပြန်လည်ထမ်းဆောင်တော့မည် ဟုဆိုသော်လည်း ထိုင်းနိုင်ငံမှ မြန်မာနိုင်ငံသို့ ပြန်လည်ရောက်ရှိခြင်း ရှိ၊မရှိဆိုသည်နှင့် ဆေးဝါးကုသနေမှု အခြေအနေကိုမူ ဦးဇာနည်အောင်က ထုတ်ဖော်ပြောကြားခြင်း မရှိပေ။
“တချို့ဆို ကောင်းနိုးနိုးရာရာ ဆေးတွေ လာပေးကြတာတွေ ရှိတယ်။ ဘာအကူအညီလိုလည်း လာမေးကြတာတွေ ရှိပါတယ်။ အဲ့လိုလူတွေကို ဝန်ကြီူချုပ်ကိုယ်စား ကျေးဇူးတင်ပါတယ်လို့ ပြောလိုပါတယ်”ဟု ၎င်းက ဆိုသည်။
အမျိုးသား ဒီမိုကရေစီအဖွဲ့ချုပ် ပါတီ ဗဟိုအလုပ်အမှုဆောင် အဖွဲ့ဝင်တစ်ဦးကမှု ဒေါက်တာဇော်မြင့်မောင်မှာ ထိုင်းနိုင်ငံတွင် ဆေးဝါးကုသမှု ခံယူနေဆဲဖြစ်ပြီး မြန်မာနိုင်ငံသို့ ပြန်လည်ရောက်ရှိခြင်း မရှိသေးကြောင်း Mandalay In-depth News သို့ ပြောသည်။
လက်ရှိတွင် မန္တလေးတိုင်းဒေသကြီး အစိုးရအဖွဲ့ လျှပ်စစ်၊ စွမ်းအင်နှင့် ဆောက်လုပ်ရေး ဝန်ကြီး ဦးဇာနည်အောင်က ဒေါက်တာဇော်မြင့်မောင်ကိုယ်စား မန္တလေးတိုင်း ဝန်ကြီးချုပ်အဖြစ် တာဝန်ယူထားသည်။
ဒေါက်တာဇော်မြင့်မောင်သည် ရုံးဖွင့်ရက်များတွင် မန္တလေးတိုင်းဒေသကြီး အစိုးရအဖွဲ့ ဝန်ကြီးချုပ် အဖြစ် တာဝန်ယူလုပ်ကိုင်ပြီး ရုံးပိတ်ရက်များတွင် အာဏာရ အမျိုးသားသားဒီမိုကရေစီ အဖွဲ့ချုပ်ပါတီ၏ ဗဟိုအလုပ်အမှုဆောင်အဖွဲ့ ဒုတိယ ဥက္ကဌအနေဖြင့် ပါတီတာဝန်များ လုပ်ကိုင်ကြောင်း ၎င်းနှင့် နီးစပ်သူများက ပြောသည်။