ကရင်အမျိုးသားလွတ်မြောက်ရေးတပ်မတော်(KNLA) နဲ့ တော်လှန်ရေးပူးပေါင်းတပ်ဖွဲ့တွေ ထိန်းချုပ်ထားတဲ့ ကော့ကရိတ် – မြဝတီ အာရှလမ်းပိုင်းနဲ့ သင်္ဃန်းညီနောင် ဗျူဟာကို စက်တင်ဘာလ ၆ရက်နေ့ကစပြီး အာဏာသိမ်းစစ်တပ်က ပြန်လည်ထိန်းချုပ် လိုက်ပါတယ်။
အာရှလမ်းမကို ပြန်လည်ထိန်းချုပ်ဖို့အတွက် ဗိုလ်ဘိဦးဆောင်တဲ့ ခွဲထွက်(DKBA)အဖွဲ့ကို စစ်ကော်မရှင်တပ်က လက်နက်ခဲယမ်း ထောက်ပံ့ပေးပြီး လမ်းပြအဖြစ် အသုံးပြုခဲ့တယ်လို့ မြေပြင် စစ်ရေး သတင်းရင်းမြစ်တွေက ပြောပါတယ်။
ဗိုလ်ဘိဦးဆောင်တဲ့ ခွဲထွက်(DKBA)အဖွဲ့ရဲ့ လမ်းပြမှုနဲ့အတူ အင်အားရာချီပါဝင်တဲ့ စစ်ကောင်စီတပ်ရဲ့အောင်ဇေယျစစ်ကြောင်းဟာ စက်တင်ဘာ၅ရက် မနက်အစောပိုင်းက
အာရှလမ်းမကြီးရဲ့တောနော်ရေတံခွန်နားကနေတဆင့် မြဝတီမြို့နယ် အတွင်း ကွင်းကလေး ကျေးရွာကို စစ်ကြောင်းထိုး၀င်ရောက်လာခဲ့ပြီး အတွင်းကွင်းကလေး ကနေတဆင့် အပြင်ကွင်းကလေးရွာဘက်ကို စစ်ကြောင်းဆက်ထိုးလာခဲ့တာပါ။
အာရှလမ်းမကို စစ်တပ်ပြန်ထိန်းချုပ်နိုင်ခဲ့တဲ့ နောက်ထပ်အကြောင်းရင်းတွေထဲမှာ စောချစ်သူ ဦးဆောင်တဲ့ ကရင်နယ်ခြားစောင့်တပ် (BGF) ရဲ့ အခန်းကဏ္ဍလည်း ပါဝင်ပါတယ်။
မြဝတီမြို့အခြေစိုက် ခြေလျင်တပ်ရင်း ခလရ ၂၇၅ အနီမှာ အရင်က BGF ရဲ့ ကာကင်းတွေနဲ့ ပိတ်ဆို့ထားခဲ့ပေမဲ့လည်း စစ်တပ်စစ်ကြောင်းထွက်လာခါနီးမှာ အဲ့ဒီကာကင်းတွေက အရင်ဆုံး နောက်ဆုတ်သွားခဲ့တယ်လို့ စုံစမ်းသိရပါတယ်။
ကိုလှိုင်း၊ စောရယ်/ Myanmar Now
Myanmar Now ဆက်လက်ရပ်တည်နိုင်ရေးအတွက် လစဥ်ငွေအနည်းငယ်ဖြင့် /qurium/myanmar-now.org/mm-members.html တွင် ကူညီနိုင်ပါသည်။
