اطلاعات روز: «د افغانستان له پخوانيو پوځیانو د ملاتړ کمېټه» وايي، په ايران او پاکستان کې پخواني پوځيان د شړلو له ګواښ سره مخ دي او که چېرې وشړل شي، ژوند يې په خطر کې لویږي.
دغه کمېټه چې له پخوانیو پوځیانو جوړه ده، نن (یکشنبه، ۲ د غویي) یې په یوه اعلامیه کې ویلي، چې په تېرو نږدې درېیو کلونو کې له ایران او پاکستان څخه ډېر اخراج شوي سرتېري د طالبانو له لوري نیول شوي او حتا وژل شوي او یا هم نامعلومو ځایونو ته وړل شوي دي.
د افغان حکومت له نسکورېدو وروسته یو شمېر پوځیان د طالبانو د غچ اخیستو له وېرې پاکستان او ایران ته تښتېدلي دي.
د «پخوانیو پوځیانو د ملاتړ کمیټې» په وینا، هغه پوځیان چې په ایران کې یې د سرشمیرنې په پلان کې برخه اخیستې، اندیښنه لري چې دغه هیواد به د خپلو ګټو د خوندي کولو لپاره طالبانو ته د دوی معلومات او ادرس ورکړي.
دغه راز دغې کميټې زياته کړې، چې په ايران کې ځينې پخواني پوځيان چې په سرشميرنه کې يې ګډون نه دى کړى او په غير قانوني ډول ايران ته ننوتي، ډير ناوړه شرايطو کې قرار لري او په پټه او ډار کې ژوند کوي.
پاکستان هم د تېر کال له پای څخه د افغان کډوالو د ایستلو لړۍ پېل کړې ده.
د «افغانستان پخوانیو پوځیانو د ملاتړ کمیټې» له ملګرو ملتونو غوښتي چې د ایران او پاکستان له حکومتونو سره په همغږۍ دې د پخوانیو افغان پوځیانو قانوني حضور د مهاجرینو په توګه برابر کړي.
دغې کمیټې د ایران او پاکستان له حکومتونو هم غوښتي چې د افغان کډوالو په تېره بیا د پخوانیو پوځيانو او د هغوی د کورنیو له ځورولو لاس واخلي او دغه بیرته ستانه نه کړي.
د افغانستان د پخوانیو پوځیانو د ملاتړ کمیټې دغه راز له هغو هیوادونو څخه چې کډوال مني غوښتنه کړې چې د افغانستان پخوانیو سرتیرو په ځانګړې توګه ښځینه سرتیرو ته بشري ویزې ورکړي، ځکه چې دوی د افغان ټولنې نورو برخو ته بشري ویزې ورکړي دي.
دغې کمېټې د تېر حکومت له پوځي چارواکو غوښتي، چې د عقیدې او وجدان له مخې خپل ملګري یوازې پرینږدي.
طالبانو واک ته د رسېدو په لومړیو کې عمومي عفوه اعلان کړه او ویې ویل چې پخواني پوځي منسوبین او چارواکي معاف دي، خو په تېرو درېیو کلونو کې د دغې ډلې له خوا په وار وار پخواني پوځيان نیول شوي او وژل شوي دي.
د «افغانستان د پخوانیو پوځیانو د ملاتړ کمیټې» د پوځیانو له حقونو څخه د دفاع له بنسټونو غوښتي چې د یوه منظم پروګرام له مخې د افغانستان د پخوانیو پوځیانو ملاتړ وکړي او د بشري حقونو د نقض، غیر قانوني نیول کېدو او د طالبانو د وژنو پر وړاندې چوپه خوله پاتې نه شي.
دغې کمیټې د طالبانو له زندانونو د څارنې غوښتنه کړې چې له دغې ډلې څخه پخواني نظامیان خلاص کړي.