اطلاعات روز: نورستان کې ځایي سرچینې خبر ورکوي، چې د دغه ولایت په منډول ولسوالۍ کې «نامعلومو وسله والو» یو ځوان په ډزو وژلی دی.
یوې سرچینې د نوم نه یادولو په شرط وویل، چې دغه ځوان نن (یکشنبه، ۴ د وږي) سهار وختي د منډول ولسوالۍ اړوند «لینر» کلي کې وژل شوی دی.
سرچینه زیاتوي، چې وژل شوی ځوان عبدالرازق نومېده او د منډول ولسوالۍ اصلي اوسېدونکی و.
سرچینې د عبدالرازق نومي ځوان د وژلو د انګېزې او قاتلینو په تړاو نور جزیات په ډاګه نه کړل.
تر اوسه نورستان کې د طالبانو ځایي مسوولینو د دغې پېښې په اړه څه نه دي ویلي.
د نورستان ځایي اوسېدونکي وایي، واک ته د طالبانو له رسېدو وروسته په دغه ولایت کې هدفي وژنې او نا امني زیاته شوې، چې د خلکو اندېښنې یې زیاتې کړي.