د امریکا ولسمشر، ډونالډ ټرمپ وایي، چې تهران او واشنګټن د دواړو هېوادونو ترمنځ د روان کړکېچ د پای ته رسولو لپاره په خبرو بوخت دي، خو د هغه په باور ایران لا هم یوې هوکړې ته چمتو نه دی.
د الجزیرې د راپور له مخې، ټرمپ دا څرګندونې د جمعې په شپه (۲د زمري) په سپینه ماڼۍ کې د خبریالانو د کلنۍ ماښامنۍ پر مهال کړي او په ټينګار سره یې ویلي، چې د دواړو هېوادونو ترمنځ خبرې روانې دي.
ټرمپ وویل: «هغوی اوس مهال له موږ سره خبرې کوي؛ هغوی غواړي یوه هوکړه وشي. زه فکر نه کوم چې هغوی چمتو وي. زما په اند، لا د هوکړې وخت نه دی رسېدلی، خو زه چمتو یم چې د هغوی خبرې واورم.»
ټرمپ یو ځل بیا ټینګار وکړ چې «ایران نه شي کولای اټومي وسلې ولري.»
هغه ادعا وکړه، چې د امریکا پوځ ایران ته سخت ګوزار ورکړی او د دغه هېواد پوځي وړتیا یې کمزورې کړې ده.
د امریکا ولسمشر وویل: «د ایران سمندري او هوايي ځواک له منځه تللي، ۲۵۰ نورې جنګي الوتکې له منځه وړل شوې او ۱۵۹ بېړۍ د سمندر تل ته تللې دي.»
هغه زیاته کړه: «اوس ایران رادار نه لري، ډېرې لږې بېپیلوټه الوتکې لري. که څه هم کله ناکله ځینې بریدونه ترسره کوي، خو ډېر امکانات ورته نه دي پاتې.»
ټرمپ وویل، د دغو ټولو اقداماتو موخه دا ده چې ډاډ ترلاسه شي ایران اټومي وسلې ترلاسه نه کړي، ځکه که یې ولري، نو کار به ترې واخلي.
د امریکا ولسمشر په داسې حال کې د دواړو هېوادونو ترمنځ د خبرو خبر ورکوي، چې د ایران حکومت تر اوسه دا ادعا نه ده تایید کړې.
د دواړو هېوادونو ترمنځ وروستۍ نښته پرلهپسې دیارلس شپې او ورځې روانه وه.
د دې نښتې پر مهال ایران د هرمز تنګی تړلی اعلان کړ او متحده ایالاتو پر ایران نوې سمندري محاصره ولګوله.
