په کابل کې د ایمرجنسي روغتون وایي، د کابل په لویدیځ کې د یوه ښوونځي په انګړ کې د پرونۍ چاودنې له امله ۳۵ ټپیان دغه روغتون ته انتقال شوي دي.
دغه روغتیايي مرکز نن (سېشنبه، ۲۷ د زمري) په یوه بیان کې ویلي، ټول ټپیان د ۱۰ تر ۱۴ کلونو عمر لرونکي ماشومان دي.
په افغانستان کې د ایمرجنسي روغتون مشر دژان پانیک ویلي: «د دوشنبې په ماښام شاوخوا شپږ بجې د کابل امبولانسونو موږ ته خبر راکړ چې یوه پېښه شوې او ګڼ شمېر ناروغان به زموږ روغتیايي مرکزونو ته انتقال شي. وروسته معلومه شوه چې چاودنه شوې ده او ټول ناروغان د چاودنې د ترکشونو له امله ټپیان شوي وو. لږ تر لږه درې تنو یې جراحي درملنې ته اړتیا لرله.»
پرون (دوشنبه، ۲۶ د زمري) شاوخوا ۴:۳۰ بجې د کابل ښار د ۱۸مې امنیتي حوزې اړوند د مهدیه ښارګوټي په سیمه کې د «شمع هدایت» خصوصي ښوونځي په انګړ کې چاودنه شوې وه.
یوې سرچینې اطلاعات روز ورځپاڼې ته ویلي چې کله زدهکوونکي له ټولګیو رخصت شوي وو، له مقابلې کوڅې څخه د ښوونځي انګړ ته لاسي بم غورځول شوی دی.
په کابل کې د طالبانو د امنیه قوماندانۍ ویاند هم د چاودنې پخلی کړی او ویلي یې دي چې په دې پېښه کې یو شمېر ماشومان ټپیان شوي دي.
خالد زدران ویلي چې چاودنه د یوه لاسي بم د غورځولو له امله رامنځته شوې ده.
د راپورونو له مخې، په دې پېښه کې لږ تر لږه ۵۲ ماشومان ټپیان شوي دي.
د دغو ټپیانو له ډلې یوازې ۱۷ تنه یوه خصوصي روغتون ته انتقال شوي او ځینې نور ټپیان په برچي کې نورو خصوصي روغتونونو ته وړل شوي دي.
ټپیان شوي ماشومان نجونې او هلکان دي.
تر اوسه د چاودنې د څرنګوالي په اړه کره جزیات نه دي خپاره شوي او هېڅ ډلې یا کس د دې پېښې مسوولیت نه دی منلی.
د یادونې وړ ده چې د کابل د لویدیځ په هزاره مېشتو سیمو کې ښوونځي او ښوونیز مرکزونه څو ځله د خونړیو بریدونو هدف ګرځېدلي دي. د دغو بریدونو ډېری مسوولیتونه داعش ډلې منلي دي.
