د ګویان حکومت اعلان کړی چې شپږ افغان او کیوبايي کډوال، چې له امریکا ایستل شوي، دغه هېواد ته انتقال شوي دي.
د اسوشیټېډ پرېس د راپور له مخې، د ګویان د بهرنیو چارو وزیر رابرټ پرساد ویلي چې دغه کسان د جمعې په ورځ ګویان ته رسېدلي دي.
هغه زیاته کړې چې د ګویان حکومت د دغو کسانو مخینه څېړلې او ډاډ یې ترلاسه کړی چې هغوی جرمي سابقه نه لري، له همدې امله یې ګویان ته د ورتګ اجازه ورکړې ده.
د ګویان د بهرنیو چارو وزیر ویلي چې دغه شپږ کسان د دوی د کډوالۍ د وضعیت اړوندو ستونزو له امله له امریکا ایستل شوي دي.
پرساد ویلي چې د ګویان حکومت له امریکا سره له څو میاشتو خبرو وروسته دې هوکړې ته رسېدلی چې د دغو کسانو کوربهتوب وکړي.
د هغه په وینا، دغه هوکړه به د یوه کال لپاره عملي وي او دا په دې معنا نه ده چې دغه کسان به په دایمي ډول په ګویان کې مېشت شي.
د اسوشیټېډ پرېس د راپور له مخې، هغه کسان چې د حکومت په مرسته د «رضاکارانه بېرته ستنېدو» د پروګرام له لارې ګویان ته انتقال شوي، تر هغې به په دغه هېواد کې پاتې شي چې د دوی د کډوالۍ وضعیت معلوم شي. دغه کسان ښايي په پای کې خپلو اصلي هېوادونو ته بېرته ولېږل شي یا بل هېواد ته انتقال شي.
د ګویان چارواکو ویلي چې د کډوالۍ نړیوال سازمان د دغه پروګرام د عملي کولو مسوولیت لري او د ګویان حکومت به د دغو کسانو د استوګنې یا ملاتړ لګښت نه ورکوي.
ګویان د جنوبي امریکا په شمال ختیځ او د کارابین په سیمه کې یو کوچنی هېواد دی چې له امریکا سره یې هوکړه کړې څو د امریکا ځینې ایستل شوي کډوال ومني.
امریکا هڅه کوي چې د ځینو کډوالو د دوسیو تر څېړنې پورې هغوی په درېیمو هېوادونو کې د «بېرته ستنېدو په مرکزونو» کې وساتي او په دې برخه کې یې له بېلابېلو هېوادونو سره خبرې کړې دي.
