د افغانستان لپاره د اروپايي ټولنې ځانګړي استازي توماس فریلیسن کابل ته د خپل سفر په پای کې ویلي، چې د ښځو او نجونو پر وړاندې محدودیتونه «د اړیکو عادي کېدو پر وړاندې یو له مهمو خنډونو څخه دي».
نوموړي د دغه سفر پر مهال د طالبانو له چارواکو، د ډیپلوماټیکې ټولنې له غړو، د ملګرو ملتونو او اسلامي همکاریو سازمان له استازو او د مدني ټولنې له فعالانو سره لیدنې کړې دي.
په کابل کې د اروپايي ټولنې استازولۍ په یوه خبرپاڼه کې ویلي، چې په ټولو خبرو اترو کې په افغانستان کې د بشري حقونو وضعیت په ځانګړي ډول څېړل شوی دی.
خبرپاڼه زیاتوي، فریلیسن د طالبانو له استازو سره په خبرو کې د ښځو او نجونو پر وړاندې د لګول شویو محدودیتونو په اړه د اروپايي ټولنې جدي اندېښنه څرګنده کړې او ټینګار یې کړی، چې دغه محدودیتونه د اړیکو عادي کېدو پر وړاندې له مهمو خنډونو څخه دي.
طالبانو د ښځو او نجونو پر حقونو او ازادیو سخت محدودیتونه لګولي دي. دې ډلې ښځې او نجونې له زدهکړو او کار څخه محرومې کړې او د جامو د اغوستلو له امله یې هم نیسي.
په تېرو پنځو کلونو کې، سره له دې چې نړیوالې ټولنې د ښځو او نجونو پر حقونو د درناوي غوښتنه کړې، د طالبانو محدودیتونه لا سخت شوي دي.
په کابل کې د اروپايي ټولنې د استازولۍ د خبرپاڼې په دوام کې راغلي، چې توماس فریلیسن د طالبانو له چارواکو سره د لیدنې پر مهال د افغانستان او سیمې د امنیتي وضعیت په اړه هم خبرې کړې دي.
د اروپايي ټولنې ځانګړي استازي د ترهګرو ډلو د دوامدار حضور او له پولو هاخوا د هغوی د فعالیتونو په اړه اندېښنه څرګنده کړې، چې په وینا یې، د داعش د خراسان څانګه هم پکې شامله ده. هغه خبرداری ورکړی، چې د دغو ډلو فعالیتونه د سیمې او ان له سیمې بهر د هېوادونو امنیت هم ګواښلی شي.
نوموړي ټینګار کړی، چې طالبان باید د خپلو هغو ژمنو عملي کولو ته غاړه کېږدي، چې له مخې یې د افغانستان خاوره باید د نورو هېوادونو د امنیت پر ضد ونه کارول شي.
د اروپايي ټولنې ځانګړي استازي د نشهيي توکو پر وړاندې د طالبانو د مبارزې په نوم یادو هڅو هرکلی کړی، خو د کوکنارو د کښت د بیا زیاتېدو په اړه یې اندېښنه څرګنده کړې ده.
هغه د زیانمنو شویو بزګرانو لپاره د بدیل او دوامدار معیشت د فرصتونو پر برابرولو ټینګار کړی دی.
د اروپايي ټولنې استازولۍ ویلي، چې د دې ټولنې ځانګړي استازي د سیمې د هېوادونو له استازو سره په خبرو کې د افغانستان او پاکستان ترمنځ د خبرو اترو پر بیا پیل ټینګار کړی، څو د دواړو لورو امنیتي اندېښنو ته رسېدنه وشي.
فریلیسن یو ځل بیا د دوحې له بهیر څخه د اروپايي ټولنې ملاتړ څرګند کړی دی. دغه بهیر د ملګرو ملتونو په مشرۍ له افغانستان سره د نړیوال تعامل لپاره پر مخ وړل کېږي.
هغه ویلي، چې په دغه بهیر کې د پرمختګ او په نړیواله ټولنه کې د افغانستان د بیا ادغام لپاره د نړیوالې ټولنې همغږي او ګډ دریځ، او همدارنګه د افغانستان د واکمنو چارواکو رغنده ګډون اړین دی.
نوموړي ټینګار کړی، چې په دې برخه کې پرمختګ د افغانستان له نړیوالو ژمنو سره پر عملي چلند پورې تړلی دی. هغه د ټولشموله حکومتولۍ پر اهمیت هم ټینګار کړی دی.
دغه اروپايي چارواکي زیاته کړې، چې اروپايي ټولنه به له افغانستان سره د مشخصو اصولو، عملي اقداماتو او د افغانانو اړتیاوو ته د پاملرنې پر بنسټ خپل تعامل ته دوام ورکړي.
فریلیسن د طالبانو له چارواکو او نړیوالو شریکانو سره په خبرو کې د اقلیمي بدلونونو په اړه هم بحث کړی او غوښتنه یې کړې، چې د اقلیمي بدلونونو اړوند پروژو ته لومړیتوب ورکړل شي، څو د دغو بدلونونو د احتمالي زیانونو مخه ونیول شي یا یې اغېزې کمې شي.
