د طالبانو د عامې روغتیا وزیر نورجلال جلالي له یوه روسي پلاوي سره په لیدنه کې د روغتیا په برخه کې، په ځانګړي ډول د روغتیايي کارکوونکو د ظرفیت لوړولو په برخه کې، د روسیې د همکارۍ غوښتنه کړې ده.
د طالبانو د عامې روغتیا وزارت نن (یکشنبه، د تلې ۲۶مه) په یوه خبرپاڼه کې ویلي چې جلالي په کابل کې د روسیې له یوه پلاوي او د دغه هېواد د سفارت له استازو سره لیدلي دي.
د خبرپاڼې له مخې، د طالبانو وزیر او روسي پلاوي د «روغتیا په برخه کې د دوهاړخیزو همکاریو پر پراختیا، په ځانګړي ډول د سرطان او د زړه او رګونو ناروغیو د تشخیص او درملنې په برخه کې د افغان روغتیايي کارکوونکو د ظرفیت لوړولو» خبرې کړې دي.
نورجلال جلالي د روغتیايي خدمتونو د کیفیت د ښه کولو لپاره د مسلکي او متخصصو کارکوونکو د روزنې پر اهمیت ټینګار کړی او د دواړو هېوادونو ترمنځ یې د «تجربو، تخصصي پوهې او مهارتونو د تبادلې» غوښتنه کړې ده.
د طالبانو د عامې روغتیا وزارت وايي چې روسي پلاوي د روغتیا په برخه کې د ګډو همکاریو د پراختیا لپاره «چمتووالی او ملاتړ» څرګند کړی دی.
د طالبانو او پاکستان ترمنځ د جګړې له پیل وروسته، طالبانو د درملو او روغتیايي اړتیاوو د برابرولو لپاره د سیمې څو هېوادونو ته مخه کړې ده. له دې ډلې، د روسیې «فارماسنتیز» درمل جوړولو شرکت له دې ډلې سره همکارۍ ته چمتو شوی دی.
