Malikanənin satışından əldə olunan gəlir Ermənistana qaytarıla bilər
ABŞ məhkəməsi Ermənistanın keçmiş maliyyə nazirinin ailəsinə məxsus Kaliforniyadakı malikanənin cinayət mənşəli vəsaitlə satın alındığına qərar verib.
Los-Ancelesdəki malikanə keçmiş maliyyə naziri Qaqik Xaçatryanın oğulları Qurge və Artyom Xaçatryana məxsusdur.
“OC Media” yazır ki, bazar ertəsi Ermənistan Baş Prokurorluğu evin satışından əldə olunan gəlirin bir hissəsinin Ermənistana qaytarılması ilə bağlı Ermənistan və ABŞ arasında danışıqların aparıldığını açıqlayıb.
İyunun ortalarında Qurge və Artyom Xaçatryan ABŞ Ədliyyə Departamenti ilə evin satışından əldə olunan xalis gəlirin 15%-ni saxlamaq müqabilində əmlakın ABŞ hökumətinə müsadirə edilməsi barədə razılığa gəliblər.
ABŞ Ədliyyə Departamentinin bəyanatında deyilir: “İş qaldıran ofislər müsadirə edilmiş gəlirlərin bir hissəsinin və ya hamısının Ermənistan Respublikasına köçürülməsini tövsiyə etmək niyyətindədir”.
Ermənistan Baş Prokurorluğu nəticəni alqışlayıb və bunun ABŞ hakimiyyəti ilə onların “səmərəli əməkdaşlığı” sayəsində baş verdiyini bildirib. İş 2022-ci ilin mayında ABŞ-da açılıb.
ABŞ Ədliyyə Departamenti evi Los-Ancelesin Holmby Hills məhəlləsində “30.000 kvadrat metrlik meqa malikanə” kimi təsvir edib. Onlar bildiriblər ki, bu, 2011-ci ildə erməni biznesmenin Qaqik Xaçatryanın biznesinə güzəştli vergi rejimi müqabilində onun ailəsinə verdiyi 20 milyon dollardan çox rüşvət hesabına alınıb.
Daha əvvəl malikanə 2022-ci ildə, məhkəmə işi başlamazdan bir müddət əvvəl 63,5 milyon dollara satışa çıxarılmışdı. Lakin bir neçə endirimdən sonra da satılmadı.
Keçmiş məmur Qaqik Xaçatryan 2008-2014-cü illərdə Dövlət Gəlirləri Komitəsinin sədri, daha sonra 2016-cı ilə qədər maliyyə naziri vəzifəsində çalışıb.
Xaçatryan və onun iki oğlu da daxil olmaqla daha 25 nəfər Ermənistanda hələ də korrupsiya istintaqı qarşısındadır. Nəticədə Ermənistan Korrupsiyaya Qarşı Mübarizə Məhkəməsi ümumilikdə 210 əmlak, 13 nəqliyyat vasitəsi, 29 hüquqi şəxsin səhmləri və 77 milyon dolları müsadirə edə bilər.
Milli Təhlükəsizlik Xidməti tərəfindən Qurgen və Artyom Xaçatryana qarşı 100 milyon dollardan çox çirkli pulların yuyulması ittihamı ilə cinayət təqibi aparılır.
Qaqik Xaçatryan vəzifə səlahiyyətlərindən sui-istifadədə ittiham olunur. Hazırda Yerevan Şəhər Məhkəməsi ona qarşı xüsusilə külli miqdarda mənimsəmə, çirkli pulların yuyulmasında iştirak və xüsusilə külli miqdarda rüşvət alma ittihamları ilə işlərə baxır.
