“Express” qəzeti yazır ki, Türkiyə və Birləşmiş Ərəb Əmirlikləri arasında son vaxtlar gərginlik yaşansa da, BƏƏ xarici işlər naziri Şeyx Abdullah bin Zayed əl-Nəhyanın göndərdiyi bir tvit Ankaranı hiddətləndirib.
Bu Tvitter postunda bundan yüz il əvvəl baş vermiş bir tarixi hadisə xatırladılır və o zamankı Türkiyə – Osmanlı imperiyası Səudiyyə Ərəbistanındakı Mədinə şəhərindən oğurluq etməkdə ittiham edilirdi.
Təhqiramiz tvitdə deyilirdi: “Bilirdinizmi ki, 1916-cı ildə türk Fahreddin Paşa Mədinə xalqına qarşı cinayət törədərək onların mülkiyyətini oğurlayıb, bu mülkiyyəti qatarla Dəməşqdən İstanbula aparıb?”
Sözü gedən tvitdə ittihamların siyahısı davam etdirilir: “Həm də türklər Mahmudiyyə Kitabxanasındakı əlyazmaları İstanbula daşıyıblar. Erdoğanın əcdadlarının tarixçəsi və onların müsəlman ərəblərin başına açdıqlarının tarixçəsi belədir”.
Lakin “Express” bunu da qeyd edir ki, əslində bu tvit Almaniyada yaşayan bir iraqlı kişi tərəfindən yazılıb, amma onu BƏƏ-nin xarici işlər naziri təkrar yayımlayıb.
Məqalədə deyilir ki, bu hərəkət Türkiyə mediasının və prezident Recep Tayyip Erdoğanın qəzəbinə səbəb olub.
Erdoğan bu iddialara belə cavab verib: “Bir qudurğan adam alçaqlıq edərək bizim əcdadlarımızı oğurluqda iittiham edir. Bu adamı nə qudurdub? Əlbəttə, neft və pul”.
Bu Tvitter çarpışmasının qızışdığı əsnada BƏƏ-nin federal şura naziri Ənvər Qarqaş da mübahisəyə qoşulub, hərçənd mövzunu dəyişərək bir az da genişlənidirib. O, Türkiyəni rüsvay edəcəyi ilə hədələyib.
Cənab Qarqaş yazıb: “Bu məsələyə təriqət mövqeyindən yanaşmaq qeyri-məqbuldur. Ərəb dünyası Tehran və ya Ankaradan idarə olunmayacaq”.
O yazdığı tvitdə bildirir: “Regionda yer alan geosiyasi rəqabət Riyad və Qahirə bel sütunu olmaqla güclü ərəb birliyini tələb edir”.
Bu arada Türkiyənin əleyhinə Dubay polis rəisinin müavini də tvit yazıb və Türkiyəni “şər” adlandırıb.
O yazıb: “Erdoğanın Türkiyəsi şər ölkəsidir”.
Türkiyə və BƏƏ arasında münasibətlər 6 il bundan əvvəl, 2011-ci ildə Ankara Yaxın Şərq boyunca yayılan Ərəb baharı inqilablarına dəstək bildirəndən başlanıb.
Bu münasibətlər 2016-cı ildə Türkiyənin xarici işlər naziri Mevlut Çavuşoğlunun BƏƏ-ni iyul çevrilişini maliyyələşdirməkdə ittiham etməsindən bəri daha da gərginləşib.
Oxunub: 1096
