Bu gün Ali Məhkəmədə “Azadlıq” qəzetinin yayım direktoru Faiq Əmirlinin kassasiya şikayətinə baxılıb.
Hakim Gülzar Rzayevanın sədrliyilə keçirilən məhkəmədə həm Faiq Əmirli özü, həm də vəkili Aqil Layıcov bəraətverici əsaslarla cinayət işinə xitam verilməsini istəyib.
Aqil Layıcov müvəkkilinə ittihamların əsassız olduğunu bildirib. Vəkil Faiq Əmirlinin Fətullah Gülənin tərəfdarı olması, onun təbliği ilə məşğul olması haqda ittihamda yazılanların absurd olduğunu bildirib. “Azadlıq” qəzetinin vergidən yayınması haqda ittihamın da əsassız olduğunu vurğulayan vəkil Vergilər Nazirliyinin 39 min manatlıq mülki iddiasının da rədd edilməsini istəyib.
Faiq Əmirli özü də çıxışında vəkilinin dedikləri ilə razı olduğunu, nəinki fətullahçılıq, ümumiyyətlə, dinlə əlaqəsi olmadığını, ittihamların qondarma olduğunu söyləyib.
Gülzar Rzayevanın sədrlik etdiyi hakimlər kollegiyası qısa müşavirədən sonra kassasiya şikayətinin təmin olunmadığını elan edib.
Faiq Əmirli 2016-cı ilin avqustunda həbs olunub. Səbail rayon Məhkəməsinin hökmü ilə ilə 3 il 3 ay azadlıqdan məhrum edilib. Hökmdə onun 39 min manat ödəməli olması da öz əksini tapıb.
Bakı Apellyasiya Məhkəməsi Faiq Əmirlinin işinə baxarkən CM-nin 70-ci maddəsini tətbiq edib və ona 2 il şərti cəza təyin edilib. Faiq Əmirli 2017-ci ilin sentyabrında məhkəmə zalından azadlığa buraxılıb.
Faiq Əmirli ittihamı qəbul etmir və saxta olduğunu bildirir.
azadliq.info
Oxunub: 180
