Avropa İnsan Hüquqları Məhkəməsi (AİHM) ölkədən çıxışı qadağan edilmiş 11 nəfərin işi üzrə qərarını elan edib. AİHM ərizəçilərin Avropa İnsan hüquqları Konvensiyasının 13-cü (səmərəli hüquqi müdafiə), habelə bu sənədin 4 saylı Protokolunun 2-ci (hərəkət etmə azadlığı) maddəsində zəmanət verilmiş hüquqlarının pozulduğunu hesab edib.
AİHM şikayətçilərin hər birinə 5 min avro mənəvi təzminat ödənilməsi qərarı verib. Məhkəmə xərclərinə görə isə şikayətçilərə 1000 avro ödəniləcək. Kompensasiyanın ümumi məbləği 64 min avrodur.
Ərizəçilər arasında jurnalistlər və hüquqşünaslarla yanaşı, REAL Partiyasının Məclis üzvü Azər Qasımlı, Beynəlxalq Bankın həbsdə olan sabiq rəhbəri Cahangir Hacıyevin bacısı Əminə Hacıyeva, Azərbaycan Beynəlxalq Universitetinin keçmiş rektoru, Fransada sığınacaq almış Elşad Abdullayevin bacısı oğlu Azad Mürsəliyev də var.
Başqa ərizəçilər Rövşanə Rəhimova, Ənnağı Hacıbəyli, Aynurə İmranova, Gülər Mehdizadə, İzolda Ağayeva, Aynurə Heydərova, Aytən Ələkbərova, Dilarə Vəliyevadır.
Avropa Məhkəməsi hazırda Türkiyədə yaşayan jurnalist A.İmranovaya münasibətdə Konvensiyanın 13-cü maddəsinin pozuntusunu tanımayıb. Belə nəticəyə gəlib ki, yerli məhkəmələr onun ölkədən çıxışıyla bağlı məsələyə mahiyyəti üzrə baxıblar, sadəcə, ərizəni təmin etməyiblər. Digərlərinin işinə isə məhkəmələr baxmaqdan imtina edib.
Ə.Hacıyeva və hüquqşünas R.Rəhimovaya isə xərclərə görə 1000 avro ödənilməsi nəzərdə tutulmayıb. R.Rəhimovanın vəkili özü olub. Ə.Hacıyeva isə xərclərlə bağlı sübut təqdim edə bilməyib, deyə AİHM-nin məlumatında bildirilir.
Bu şəxslərin Azərbaycandan çıxışına qadağa 2012-2016-cı illərdə qoyulub. Bu zaman onlar cinayət işlərində şübhəli və ya təqsirləndirilən şəxs deyil, yalnız şahid qismində keçirdilər.