Zorən baş nazir vəzifəsinə gətirilən fransız dili müəllimi
Binəva Novruz Məmmədovun baş nazirliyi lap Mirzə Fətəlinin Yusif Sərracının şahlığına bənzədi. Müəllim cəmi 6 ay otura bildi məcbur oturdulduğu kresloda. İnsafən, adam sözünü başdan demişdi ki, ondan baş nazir olmaz. “Cənab prezident çağırıb dedi ki, sənin Baş nazir olmağını təklif edirəm. Elə vəziyyətdə qaldım ki… Fikirləşdim, bu mümkün olan şey deyil! Cənab prezidentə dedim ki, Baş nazir olmağı mən bacarmaram. Mənim üçün bu çətin olar. Dedi ki, yox. Mənim bir neçə namizədim var. Onlardan biri sənsən…” Həqiqətən, Novruz Məmmədov fəaliyyəti dövründə layiqincə sübuta yetirdi ki, ondan baş nazir olmazmış. Onun tək yaddaqalan işi xalqın meşələrdən meyvə və giləmeyvə yığmasını qadağan edən qərarı idi ki, onu da İlham Əliyev təsdiqləmədi. Kimə lazım idi bu şou? Fransız dili müəllimini o boyda vəzifəyə gətirib, belə hörmətsiz etmək çoxmu vacib idi? Əslində, məsələ bunda da deyil axı. Siyasətdən az-çox başı çıxan hər kəs bilir ki, Əliyev Novruz müəllimi o posta yalnız bir məsələyə görə təyin edə bilərdi-ailəyə sonsuz sədaqətinə görə. Müəllim özü də etiraf edib ki, Heydər Əliyevə olan sevgisinə görə nəvələrindən birinin adını Zərifə, birini də Heydər qoyub. Ancaq ortada başqa bir Azərbaycan gerçəkliyi var-hər şeyin bir diktə düyməsi ilə idarə olunduğu yerdə nə fərqi baş nazir Artur Rasizdə olsun və ya Novruz Məmmədov? Axı bu ölkədə hamı bilir ki, baş nazirini səlahiyyətlərini icra edən şəxs elə prezidentin özüdür. Guya Artur Rasizadə uzun illər ərzində baş nazir vəzifəsində hansısa bir iş görüb?
Bu sistemdə bacarıqlı kadr olmaq nəyisə dəyişirmi?
Xülasə, 6 aylıq baş nazirlik “fəaliyyətindən” sonra Məmmədovun yerinə daha “cavan” kadr gətirildi – 63 yaşlı Əli Əsədov. Şübhəsiz, o da Naxçıvan bölgəsinin yetirməsidir. Ali təhsilini Moskvada alıb, orda Xalq Təsərrüfatı İnstitutunu bitirib. 1995-2000-ci illərdə Milli Məclisin deputatı olub. Onu hökumətə Azərbaycan Həmkarlar İttifaqları Konfederasiyasının sədri Səttar Mehbalıyevin gətirdiyi deyilir. 1998-ci ildən Prezidentin İqtisadi məsələlər üzrə köməkçisi, sonra Prezidentin Administrasiyası rəhbərinin müavini, 2017-ci ildən Prezidentin iqtisadi məsələlər üzrə köməkçisi-şöbə müdiri təyin olunub. Kadr bacarığı nöqteyi-nəzərdən, çoxları hesab edir ki, Əli Əsədov yaxşı təşkilatçıdır, tikinti işlərini yaxşı bacarır, Bakının rekonstruksiyası bütünlükdə onun əməyidir. Mübahisə etmək fikrimiz yox, Əsədovun əvvəlki iki baş nazirlə müqayisədə daha işlək və bacarıqlı kadr olduğuna inanaq. Ancaq bu, hər şeyin bir düymədən idarə olunduğu sistemin hansısa vintini dəyişəcəkmi? Heç ağlınıza da gətirməyin. Bu sistemdə heç kimin qoyulan cızıqdan kənara çıxmaq ehtimalı yox. Kənara çıxan, ümumiyyətlə, oyundankənar sayılar və qolundan tutulub atılar kənara.
Əli Əsədovun dosyesi və itaətkarlığa möhür vuran məşhur şəkil
İndi gələk, Əli Əsədovun bu hakimiyyətdə işlədiyi müddətdə xalqa bəlli olan reputasiyasına. Bütün başqa hökumət kadrları kimi, onun da mətbuata davamlı gündəm olan qaranlıq bir dosyesi var. Hələ dörd il bundan əvvəl MTN naziri Eldar Mahmudovla bağlı cinayətlər ortaya çıxanda, çoxları Əli Əsədovun da vurulacağını düşünürdü. Həmin hadisələr zamanı onun adı da xeyli çirkli işlərin içində hallanırdı. Lakin o ağır vaxtda Əsədov susqunluğunu qorudu, yaxın qohum olduqları söylənən Mahmudovu satmadı. Hansı ki, istintaq materiallarında Mahmudov tərəfindən 2 milyard pulun ölkədən çıxarılmasına Əli Əsədovun rəhbərlik etdiyi bildirilirdi. Sonra onun İstanbulda “Azimport” MMC-də şərikləri olan erməni əsilli Rəşad Məmmədovun, onun qaynı Azər Əsgərov və Xəzər rayon İH Başçısı Gülağa İsmayılovun adına 3 ədəd mehmanxana aldığı yazıldı. Bundan başqa 2011-2013-cü illər üzrə Bakının və ətraf qəsəbələrin sosial-iqtisadi inkişafı ilə bağlı bütün işlərin ona məxsus “Azimport” MMC tərəfindən həyata keçirildiyi məlum oldu. O ərəfədə media yazdı ki, Əsədov bulvarın rekonstruksiya və genişləndirilməsi, Fontanlar meydanının yenidən qurulması və digər layihələrdə şərik olan Musa Süleymanovun adına Beynəlxalq bankdan 100 milyon manat girovsuz kredit götürüb və bu pullar Batumidə otel və kazino tikintisində istifadə olunub. 2015-ci ilin may ayında DİN MCQMİ tərəfindən saxlanılan Musa Süleymanovun azad edilməsi və Azərbaycandan qaçmasını da Əli Əsədov təşkil edib.
Xatırlayanlar varsa, beş il bundan əvvəl mətbuata Əli Əsədovun evindən 400 000 avro pul oğurlandığı xəbəri də sızmışdı. Sonra həmin oğrularla bir kamerada yatan siyasi məhbuslardan biri yazdı ki, oğurluq həqiqətən də olub. Bu hadisəyə görə həbs olunan 20 nəfərə “Bandotdel”də işgəncə verilərək, üstlərinə narkotik maddəsi qoyulub. Çünki Əli Əsədov tapşırıq verib ki, onun adı məhkəmədə çəkilməsin. Lap şişirdilmiş faktlar olsa belə, bütün bu yazılanların içində ən azı 70-80% həqiqət payı var. O zaman “İlham Əliyev nədən bu qədər kadrın arasından Əli Əsədovu seçdi” sualının cavabı da, yəqin ki, “bacarıqlı kadr” arqumentindən daha çox itaətkarlıq, sədaqət məsələsinə bağlıdır. İllərdir mediadan düşməyən məşhur şəkli – Əsədovun sevimli prezidentinin qarşısında ikiqat əyildiyi şəkli xatırlayın. Sizcə, o şəkil hər şeyi demirmi?