Təzəxan Mirələmli
İlham Əliyevin Yaponiyanın “Nikkei” qəzetinə müsahibəsindən sonra “yeridir” , yoxsa “yeri deyil” dilemmasında bu dəfə birinci qalib gəldi. Amma yenə sərt yazmayacağam, “yeri deyil” üçün də bir qədər şans saxlayacağam.
Prezident deyir ki, siyasi partiyaların mütləq əksəriyyəti işğal olunmuş ərazilərin qaytarılması ilə bağlı mənim yürütdüyüm siyasəti tam dəstəkləyir, cəmi iki partiya bu prosesdə iştirak etmir. Bununla bağlı elə həmin iki partiyanın rəhbərləri “yeri deyil” prinsipinə sadiq qalaraq öz iradlarını bildirdiyi üçün mən o məsələyə çox toxunmayacağam. Bəlkə də, İlham Əliyev “mənim yürütdüyüm siyasəti bütün partiyalar dəstəkləyir, iki partiyadan başqa” demək istəyib, yapon jurnalist onu konteksdən çıxarıb… Çünki işğal olunmuş ərazilərin qaytarılması ilə bağlı müxalifət ilk gündən, lap elə o torpaqlar itirildiyi gündən bir mövqedə olub. Bəs İlham Əliyevin yürütdüyü hansı siyasətə müxalifət qarşı çıxıb? İlham Əliyevin yapon jirnalistləri aldatmağa cəhd etdiyi cavabda özü həmin məsələrə toxunub. Bildirib ki, Azərbaycanda bütün əsas azadlıqlar təmin olunub, siyasi fəaliyyət azadlığı, media azadlığı, ifadə azadlığı, sərbəst toplaşma azadlığı, dini etiqad azadlığı və s. Biz də qoşulub digər partiyalara inanaq, sosial və iqtisadi azadlıqlar barədə demir, tutaq ki, onlar da tam təmin olunub. Amma belədirmi?
Mən öz təcrübəmdə bəzi məsələlərə aydınlıq gətirmək istəyirəm… Bildiyiniz kimi, oğlum Vahid ilk gündən cəbhədədir. 2016-cı ilin aprel döyüşləri də onun həqiqi xidmət dövrünə düşüb və həmin döyüşlərin iştirakçısı olub. Amma baxaq görək elə həmin oğlum hökumətin hansı imtiyazlarından, təmin olunmuş azadlıqlarından istifadə edib?
2011-ci ildə ailəmizə qarşı başlanmış repressiv fəaliyyətin nəticəsində Vahid heç ümumi orta təhsil də ala bilmədi. İlham Əliyevin “Tərəqqi medalı” ilə təltif etdiyi məktəb direktoru sənədlərini vermədiyi üçün 8-ci sinifdən məktəbdən ayrılmalı oldu. Təkcə bu səbəbə görə o həqiqi hərbi xidmətdən imtina edə bilərdi, amma əksinə ilk çağırışda xidmətə yollandı və mühəndis istehkamçı kimi kurs keçib ən təhlükəli xidmət növündə xidmətini başa vurdu. Yəni, ilk olaraq onun təhsil almaq hüququ pozuldu…
Hərbi xidmətdən qayıtdıqdan sonra iş üçün məcburi surətdə ölkəni tərk etməli oldu. Qardaş Türkiyədə bir neçə il işlədikdən sonra, bir gənc kimi ailə qurmaq istədi. Bu yöndə də problemlə üzləşdi. Bu barədə bir il əvvəl yazdığım üçün həmin məsələyə də toxunmayacağam. Təxminən bir il əvvəl dostların sayəsində həmin möhtəşəm toy baş tutdu. Lakin pandemiya ilə əlaqədar yenidən Türkiyəyə qayıda bilmədi. İşsiz kimi qeydiyyata düşüb bir vətəndaş olaraq dövlətin yardım paketindən yararlanmaq istədi. Amma cavab “yox” oldu, aztəminaatlılıq meyarına uyğun deyilmiş. Bu barədə Əmək və Əhalinin Sosial Müdafiəsi nazirliyinə rəsmi məktubuna bu günə kimi də cavb gəlməyib. Axı özləri də bilirlər, nə evi var , nə maşını… Bircə əmlakı mobil telefonu idi… Yenə hökumətin “qayğısı” mənim oğlum olduğu üçün nə Vahidə, nə də qardaşına şamil olunmadı…
İki qardaş tikintidə fəhləlik edərək (bir gün iş olanda bir gün olmurdu) bir təhər gün keçirirdi.
Sentyabrın 21-də hələ səfərbərlik elan olunmamışdan əvvəl ixtisaslı hərbi mükəlləfiyyətlilər təlimlərə çağrılanda gecə ikən hərbi komissarlğa getdi. İlk gündən ön cəbhədə yer aldı. Yenə xatırladıram, o, gedəndən sonra bu günlərdə dünyaya gəlməli olan oğlu anasının səhhətində yaranan problemə görə bir ay tez əməlliyat yolu ilə dünyaya göz açdı. Hə, cənab İlham Əliyev, burada da səhiyyə islahatlarınızla “yaxından tanış olmaq” imkanlarımız oldu… Əvvəldən qeyd etdiyim kimi dərinə getməyəcəyəm…
Yeri gəlmişkən bir məsələyə də toxunmalıyam, deyirsiniz siyasi fəaliyyət azadlıqları da təmin olunub, yəni heç kimə siyasi fəaliyyətinə görə ayrısecilik olunmur… Niyə görə Avropa İnsan haqları məhkəməsi tərəfindən 2016-cı ildə çıxarılmış qərarla mənə (eləcə də bir sıra siyasi fəallara) çatacaq kompensasiya ödənilmir? Niyə görə mən borc edib ailəmin səhiyyə xərcini ödəməliyəm? Bu məsələyə məsul şəxs olan, həm də Ali Məhkəmənin sədr müavini Çingiz Əsgərov isə “mənlik deyil” deməkdən ayrı söz bilmir.
Baxın, cənab İlham Əliyev, biz sizin “işğal olunmuş ərazilərin qaytarılması ilə bağlı yürütdüyünüz” siyasətiin əlehinə yox, sizin yürütdüyünüz təhsil, gənclər, işsizlik, səhiyyə, insan haqları, siyasi ayrımçılıq və s. siyasətlərin əleyhinəyik. Onu da işğal olunmuş ərazilərin qaytarılması ilə bağlı hələlik dilə gətirmirik, gözünüz arxada qalmasın…