Milli Şuranın Koordinasiya Mərkəzinin üzvü Gültəkin Hacıbəyli
Cenevrə danışıqlarına görə narahatlıq başadüşüləndir, hamımız narahatıq, gərginik. Ancaq danışıqlar Azərbaycanın baxış bucağından uğurlu olub, diplomat olmasa da xarici işlər nazirimiz mövqelərimizdə sonadək dayana bilib, çünki Bakı və Ankara torpaqlarımızı işğaldan azad etməkdə qərarlıdır.
ABŞ prezidentinin müşaviri Robert Olbrayn səsləndirdiyi qeyri-məqbul açıqlamaya gəlincə, burada da əndişələnmək üçün ciddi əsas görmürəm.
- ABŞ-da prezident seçkilərinə 3 gün qalır, ABŞ siyasilərinin bütün açıqlamaları məhz bu rakursdan dəyərləndirilməlidir. Prezidentin müşavirinin açıqlaması heç şübhəsiz ki, Baydenin bir-neçə gün öncə səsləndirdiyi təxminən eyni məzmunlu fikirlərə qarşılıq balans yaradaraq gərgin və həlledici seçki öncəsi ermənilərin səsini itirməməyə yönəlik əsk-həmlədir. Trampın yenidən seçiləcəyi halda bu ritorikanı davam etdirəcəyini düşünmürəm. Bayden seçiləcəksə, o 2021-ci ilin yanvarında səlahiyyətlərinin icrasına başlayanda Azərbaycan Bayrağı çoxdan Xankəndinin və Şuşanın səmasında dalğalanacaq.
- ABŞ tərəfindən Türkiyənin vasitəçi ola bilməyəcəyi fikrinin səsləndirilməsi başadüşüləndir. Türkiyə heç indi də vasitəçi deyil, ancaq vasitəçidən ötədir- bizim arxamızdır, dayağımızdır, mənəvi-siyasi və hərbi-texniki dəstəyilə yanımızdadır. Şübhəsiz ki, ABŞ-ı qayğılandıran məqam NATO üzvü olan Türkiyənin yox, Rusiyanın regionda lövbər salmasıdır. Digər tərəfdən, Türkiyənin vasitəçiliyi ermənilərin bu təşəbbüsü bloklayacağını nəzərə alsaq, real görünmür. Türkiyə artıq çoxdan siyasi meyitə çevrilmiş Minsk Qrupunun həmsədri olmayacaq, ancaq münaqişənin həllində ən kəsərli və həlledici söz sahibi olmaqdan onu heç bir qüvvə kənarlaşdıra bilməz. Hətta, Putin də bu gerçəklə barışıb.
3.Ermənilərin Rusiyaya yalvararaq münaqişəyə hərbi müdaxilə etməsini istəməsi, rus sülhməramlılarının Qarabağa yerləşdirilməsinə təkid etməsi fonunda ABŞ-ın “sülhməramlılar həmsədr ölkələrdən ola bilməzlər” deməsi Azərbaycanın maraqlarına tam uyğun yanaşmadır. ABŞ bu məqsədlə Skandinaviya ölkələrini nəzərdən keçirir. Uğurlu təşəbbüsdür. Məncə, bu həssas məsələnin müzakirəsi və razılaşdırılması da illərlə vaxt tələb edəcək və Azərbaycan tərəfi münaqişənin sülh yolu ilə nizamlanmasına sadiq tərəf olaraq bu danışıqlarda aktiv şəkildə iştirak etməlidir. Ermənilər on illər ərzində etdiyi kimi.
- ABŞ rəsmisinin son açıqlamasına Türkiyə-Fransa münasibətlərinin gərginləşməsi, Makronun qərəzli və qeyri-ciddi “vasitəçi” kimi ifşası fonunda Fransanın basqısı da öz təsirini göstərib, həlledici olmasa da bu faktor da nəzərə alınmalıdır.
- BMT qətnamələrinə istinad edilməməsindən dolayı narahatlıq var, ancaq əbəsdir. BMT Təhlükəsizlik Şurasının 822, 853, 874 və 884 saylı qətnamələri Qarabağın özü ilə deyil, Qarabağətrafı rayonların işğalı ilə bağlı qəbul edilib. Həmin qətnamələrin tələblərinin böyük əksəriyyətini Şanlı Azərbaycan Ordusu artıq icra edib- Füzuli, Cəbrayıl, Zəngilan və Qubadlını işğaldan azad etməklə. Laçın, Kəlbəcər və Ağdamın işğaldan qurtuluşu gün məsələsidir, bəlkə də artıq bu istiqamətdə də uğurlarımız var. Hətta Putin belə 7 rayon Azərbaycanındır və sahibinə qaytarılmalıdır tipli bəyanat səsləndirirsə, demək, BMT qətnamələri artıq aktuallığını itirir.
- Hal-hazırda masaya yatırılan Yuxarı Qarabağ- Şuşa, Xankəndi, Ağdərə, Xocalı, Xocavəndin taleyidir. Rəcəb Tayyib Ərdoğan məhz bununla bağlı “qırmızı xətlər” cızdı, “atamın oğluna da keçmərəm” dedi. İlham Əliyev “referendum olmayacaq, muxtariyyət olmayacaq” deyəndə məhz bunları nəzərdə tuturdu. Əfrat rayonların hər qarışını şəhid qanı ilə suvaran Azərbaycanın bu mövqedən bir addım da geri çəkilməsi mümkün görünmür. Azərbaycan xalqı bunu qəbul etməz.
- Hər şeydən göründüyü kimi Qarabağ münaqişəsinin nizamlanması ən azı son bir ayda siyasi mahiyyətini itirərək daha çox hərbi xarakter kəsb etməkdədir. Və ABŞ bu məsələyə öz münasibətini dünyanın ən qüdrətli hərbi-siyasi ittifaqı olan NATO-dakı rəsmi nümayəndəsinin dil ilə hələ günlər öncə bəyan edib: münaqişə sərhədlərin toxunulmazlığı və suverenlik prinsipləri çərçivəsində həll olunmalıdır. Vəssalam!
Odur ki, Cenevrə görüşlərilə bağlı narahatlığa əsas yoxdur. Belə görüşlərdən hələ çox olacaq. Biz məmnuniyyətlə onların hamısında iştirak edəcək və münaqişənin sülh yolu ilə tənzimlənməsinə öz tövhəmizi verəcəyik.
Eyni zamanda Şanlı Ordumuz və igidlərimiz və Qarabağda- Şuşada və Xankəndində sülhyaratma prosesinə öz möhtəşəm dəstəyini verməkdə davam edəcəklər. Çünki, Bismarkın məşhur bir ifadəsində deyildiyi kimi ” Sülh istəyirsənsə, müharibəyə hazırlaşmalısan”.
Hər şey çox gözəl olacaq!
Tanrı qəhrəman əsgər və zabitlərimizi qorusun! Hazırda diplomatiyamızın, Ceyhun Bayramovun işini onlar görürlər, özü də mükəmməl şəkildə və onları bu müqəddəs yoldan kimsə döndərə bilməz!