Milli Şuranın sədri Cəmil Həsənli
Ölkədə müharibə gedir. Heç yazmaq istəmirdim bunu. Amma məcburam. Söhbət sabah əsgər olacaq, vətənə xidmət edəcək 16 yaşlı bir yeniyetmənin taleyindən gedir. İbrahim Həsənli mənim nəvəmdir. 2007-ci ildə oğlum avtomobil qəzasında həlak olandan sonra onu övladlığa götürmüşəm. İbrahim ötən il Bakıdakı 132 saylı məktəbin 9-cu sinfini əla və yaxşı qiymətlərlə bitirdikdən sonra mənim Amerikaya 10 aylıq dəvətim olduğu üçün onu da özümlə aparmışdım. Bu barədə onun oxuduğu 132 saylı məktəbə məlumat verilmiş və növbəti dərs ilində onun yenidən məktəbə qayıdacağı bildirilmişdi. İbrahimin şəxsi işi, 9-cu sinfi bitirməsi barədə şəhadətnaməs və bütün təhsil sənədləri 132 nömrəli məktəbdədir.
2019-2020-ci dərs ilində İbrahim Amerika Birləşmiş Ştatlarının Merilend ştatında Montgomery County “Northwood High School”da təhsilini davam etdirdi. Yaxşı təhsil göstəricilərinə görə məktəb rəhbərliyi onu fəxri fərmanla təltif etmişdi.
Mənim proqramım bir qədər uzandığı üçün İbrahimi Bakıya yola saldım ki, vaxtında məktəbə qayıtdığını bildirib təhsilini davam etdirsin. Məktəbdən dedilər ki, bu ildən bu məsələlərə Təhsil Nazirliyi baxır. Ona görə yoldaşım Təhsil Nazirliyinə sentyabr ayının 3-də İbrahimin öz oxuduğu 132 saylı məktəbdə təhsilini davam etdirməsinə razılıq verilməsi ilə bağlı ərizə yazdı və onun Amerika məktəbindəki sənədlərini də ərizəyə əlavə etdi. Elə həmin gün ərizə və sənədlər nazirliyin qəbul şöbəsindəki əməkdaşa təqdim edildi və həmin əməkdaşın tövsiyəsi ilə sənədlər Nazirliyin yaxınlığındakı poçt idarəsindən həm adi, həm sürətli poçtla Nazirliyə göndərildi.
Nazirlik sənədlərlə tanış olduqdan sonra sentyabr ayının 23-də yoldaşımın ərizədə göstərdiyi ünvana yaxınlıqlarındakı 8 saylı poçt idarəsindən cavab məktubu göndərib. Dərslər başlandığı üçün qızım demək olar ki, hər gün təhsil nazirlinə getməsinə baxmayaraq cavab məktubunu və ya məktubun kopiyasını əllə ona vermədilər. Lakin bu gün noyabrın 3-nə qədər həmin məktub 40 gün ərzində gəlib bizə çatmayıb. Necə ola bilər ki, eyni şəhərdə Təhsil Nazirliyindən təxminən 3 km aralı olan ünvana 40 gün ərzində məktub yetişməsin?
Deyirlər müharibə gedir. Allah qələbə ilə sona çatdırsın, torpaqlarımız azad olsun. Amma müharibə Təhsil və Rabitə nazirliklərinə də aiddir. Müharibə o deməkdir ki, dövlətin hər bir nazirliyi saat mexanizmi kimi çalışmalıdır. İkinci dünya müharibəsi dövründə Azərbaycandan min kilometrlərlə uzaqda olan səngərlərdən əsgərlərin öz ailələrinə səhra poçtları vasitəsi ilə göndərdiyi üçkünc məktublar iki həftəyə ünvanına yetişirdi. Bakı şəhərinin içərisində isə Təhsil Nazirliyindən 16 yaşlı şagirdin taleyi ilə bağlı cavab məktubu 40 gündür ünvanına çatmır.
Burada ən dəhşətlisi odur ki, Təhsil Nazirliyinə qızım dəfələrlə zəng edib məktubun yetişmədiyini bildirsə də, onlar nə cavabın kopiyasını verir, nə də həmin cavabı İbrahimin təhsil aldığı 132 nömrəli məktəbə göndərirlər. Əvvala niyə şagirdin öz oxuduğu orta məktəbə bərpa olub təhsilini davam etdirməsi Təhsil Nazirliyi səviyyəsində həll olunmladır. Əgər belə bir qayda varsa, niyə Nazirlik 16 yaşlı məktəblinin taleyinə, onun təhsildən kənarda qalmasına belə laqeyd, biganə yanaşmalıdır? Bəlkə bu biganəliyin arxasında siyasi təqib çalarları vardır? Yoxsa, Təhsil Nazirliyinin şagirdin təhsilini davam etdirməsi ilə bağlı öz cavabını burdan-bura tabeçiliyində olan 132 saylı məktəbin rəhbərliyinə çatdırması bu qədər çətin bir işdir?
Məktubun kopiyasını elektron göndərişə yükləməyə bir neçə saniyə vaxt lazımdır. Niyə etmirlər? İcazə verin deyək ki, bizə görə məktəbli uşaqlarımızı da təqib edirsiniz, müxtəlif bürokratik yollarla onların təhsil almasına maneçilik törədirsiniz, konstitusyon hüququ olan təhsildən kənarda qoyursunuz. Bax budur əsas səbəb!?
Rabitə və Nəqliyyat Nazirliyi haqqında bir müddət əvvəl yazmışdım. İyul ayında mənim ev ünvanıma İsraildən Bakının keçmişi ilə bağlı nadir bir kitab göndərmişdilər. Kitabı 40 gün saxlayandan sonra geri qaytarıblar, bəhanə də edirlər ki, guya bağlamanın üzərində ünvan yazılmayıb. Hansı poçt ünvansız bağlama qəbul edər? Biz bağlamanın üzərindəki ünvanın fotosunu göstərəndə çox pərt olub başlarını aşağı saldılar.
İndi deyəsən Təhsil Nazirliyinin yaxınlığındakı 8 saylı poçt idarəsindən göndərdiyi məktubun üzərində də “ünvan yoxdur”. Əks təqdirdə İsraildən göndərilən kitab bağlaması 3 həftə ərzində Bakıdakı ərazi poçt idarəsinə yetişdiyi halda, Bakının mərkəzindən – Təhsil Nazirliyindən beş addımlıq bir ünvana göndərilmiş məktub 40 gün ərzində niyə yetişməməlidir? Nə qədər istəyirsən inanmayasan, amma olmur. Siyasi bir səbəb yoxsa, onda bunun adı nədir?!
P.S. Bağlamanın üzərində ünvan yoxdu bəhanəsi ilə yenidən İsrailə geri qaytarılan kitab göndərişinin üzərində ağ kağız üzərində qara şiriftlə yazılmış ünvanı aşağıda özünüz görə bilərsiniz.