AXCP Rəyasət Heyətinin üzvü Fuad Qəhrəmanlı
İntiharların sayı çoxalır. İnsanlar niyə intihar edir? İdda olunduğu kimi, intihar heç də insanların problemr qarşısındakı çarəsizliyindən doğmur.
Milyonlarla insan hər gün qarşısında çarəsiz qaldığı problemlərlə yaşayır. Hətta, ölümü labüd olan xəstələr belə, son ana qədər yaşayır, ölməmək üçün hər vasitəyə əl atır. Bu çarəsiz görünən problemlər qarşısında əksəriyyət mücadilə verərkən, nədən digərləri intihar qərarı verir ?
Səbəbindən asılı olmayaraq, intihar insan ruhunun sınmasıdır, mənəvi tükənmədir, həyata olan marağın, istəklərin bitməsidir. Bundan sonra yaşamaq mənəvi işkəncəyə çevrilir.
Gərəksizlik, lazımsızlıq duyğusuna təslim olan insan, yaşadığı daxili iztirablardan qurtulmaq üçün intihar yolunu seçir. İntihar edənlərin əksəriyyəti özlərini heç kim üçün gərəkli saymırlar. Sevmədiyin, kimsəyə lazım olmadığın həyatda, nəyə görə hər gün iztirablara dözəsən? Buna dəyirmi? İnsan çətinliyə dözümünün motivini, səbəbin itirəndə nəinki başqasına görə, heç özünə görə də əzaba dözmək istəmir.
İntihara gedən insan özünə qapanır, bədbəxtlik hissinə təslim olur, heç nədən məmnun ola bilmir, zövq duymur, həyatın sonsuz bir məşəqqət dənizi kimi onu qəhr etdiyindən vahiməyə, ümidsizlik girdabına düşür. İntihar yolu tutan insan həyatındakı mənasızlıqdan doğan bezginliklə isterik həddə çatır. Depresiyaya düşür.
Hər gün təkrar olunan yeknəsəq həyat ritualları insanı sanki, öz gündəlik dəyişməz həyat qaydaları içərisində həbsə salır, duyğu və həyacanları, hissləri korşalaraq reaksiya vermək qabiliyyətini itirir. İnsan yaşamır, sanki hər gün səhnədəymiş kimi bir aktyor kimi öz rolunu oynayır.
Beləcə yaxın ətrafdan qopub tənhalaşmış, cəmiyyətdən özgələşmiş insan, mənən öz içində öldükdən sonra, fiziki intihara qərar verir.