Milli Şuranın sədri professor Cəmil Həsənli
Şuşa şəhərində inşa ediləcək məscidin layihəsi sosial mediada yayılıb. Əgər doğrudan da məscid bu layihə üzrə tikiləcəksə burada bəzi diqqəti cəlb edəcək məqamlar var. Bu məqamların birincisi ondan ibarətdir ki, məscidin əsas tikilisi, ibadət yeri ilə minarələri alasinda harmoniya pozulub. Ola bilsin ki, məscidin əsas binasına uyğun gəlməyən belə hündür minarələr Qarabağın hər yerindən görünmək məqsədiylə edilir. Amma bu, İlham Əliyev tərəfindən inşa edilən “Allahın Evi”nin təbliğatı məqsədlərə xidmət etməsi hesabına deyil, digər arxitektura imkanları hesabına həll edilməlidir.
İkincisi və daha önəmlisi isə, layihədə nəzərdə tutulan qoşa minarələr, dini ibatəd yeri olan məscid minarələrindən daha çox raket qurğularının başlıqlarına oxşayır. Üçüncüsü isə İslam dini yarandığı gündən israfçılığın əleyhinə olub. Ölkədə bu qədər ac və yalavac, evsiz insanlar, uşaq puluna həsrət qoyulan yarıac körpələr olduğu halda, din adı altında Allaha belə dəbdəbəli ev inşa etmək ən azı şöhrətpərəstlik azarından irəli gələn israfçılıqdır.
Belə israfçılığı Azərbaycan xalqı “Heydər məscidi”nin timsalında bir neçə il əvvəl görüb. Bir milyarda yaxın vəsait sarsıntılar içində olan xalqın boğazından kəsilib ən zəruri ehtiyaclarını ödəmək əvəzinə, tibbi sığorta tətbiq etmək, uşaqpulu vermək, şəhid ailələri və qazilərin sosial təminatını yaxşılaşdırmaq, yaşlı insanlara qayğını gücləndirmək əvəzinə, ömrü boyu İslam dininə qarşı mübarizə aparmış, din xadimlərini təqib etmiş, təhlükəsizlik orqanlarının “Yasin surəsi” əməliyyatına rəhbərlik etmiş KQB sədrinin, ateist Kommunist Partiyasının birinci katibinin, dinsiz Siyasi Büro üzvünün adına Məscid tikməyə sərf edildi. İndi biz dünyada Sovet Politbürosunun üzvünün adına “Allahın Evini” inşa etmiş, ateist Sovet Hökumətinin 5 ilində dini inanclara qarşı mübarizə aparmış bir hökumətinin ikinci adamının adına Heydər məscidi açmış, ibadət yeri inşa etmiş birinci ölkəyik. Nə qədər gülməli, gülməli olduğu qədər də ağlamalı olsa da Azərbaycanda keçmiş KGB sədri, Kommunist Partiyasının birinci katibi, Sovet Politbürosunun üzvü “Allahın Evinə” də daxil oldu. Bir anlığa təsəvvür edin ki, Rusiyada Brejnevin, Kosıginin, Andropovun, lap elə təzə rəhmətə getmiş Yeqor Kuzmiç Liqaçovun adına “Kuzma” xristian məbədi, “Android” provaslav xramı tikilsin və rus möminləri də girib orada Ata Allaha, Müqəddəs Ruha, İsa Məsihə dualar oxusunlar, rus körpələrini xaç suyuna salsınlar.
Şuşaya gəldikdə isə Şuşa məscidlər şəhəridir. Tarixən Şuşada 17 məscid, iki erməni, bir rus (Qalada yerləşən rus hərbi qarnizonu üçün) kilsəsi fəaliyyət göstərib. Şəhərin başlıca memarlıq abidələri olan Aşağı Gövhər ağa məscidi, Yuxarı Gövhər ağa məscidi, Culfalar məscidi, Hacı Yusifli məscidi, Köçərli məscidi, Mamay məscidi, Mərdinli məscidi, Quyuluq məscidi, Saatlı məscidi, Seyidli məscidi, Çöl Qala məscidi, Xoca Mərcanlı məscidi, Təzə məhəllə məscidi Şuşanın mədəniyyət inciləri olub. Məhz bu abidələr bu şəhərin kimə məxsus olmasının tarixi şahidləridir. Əhalisi o qədər də çox olmayan və ərazisi o qədər də geniş olmayan bir bir şəhər üçün tarixin yadigarı olan bu müqəddəs yerlər ibadət üçün kifayət qədər yetərlidir və aydındır ki, yeni Məscid Şuşada ibadət ehtiyacından inşa edilmir.
O məscidə çəkilən xərcə köhnə Şuşanı bərpa edib, köhnə şuşalıları öz köhnə şəhərlərinə qaytarmaq daha səvab bir iş olardı. Şuşa öz köhnə görnüşü ilə, şəhərin köhnə görkəminin bərpası ilə gözəldir, köhnə arxitekturası ilə cazibədardır. Adamları Şuşaya cəlb edən yeni tikililər yox, məhz köhnə Qala şəhəri ola bilər. Bu məmləkətdə bu mümkün deyil, çünki bizim “Müzəffər” feodal hər şeyi hər kəsdən daha yaxşı bilir. Məscidin təməlinə atılan palçığın nəmi qurumadan ona İlham məscidi adı verilməsi haqqında təkliflər də səsləndirildi. Bir məmləkətdə Heydər məscidi varsa İLHAM (İlham + Leyla + Heydər + Arzu + Mehriban) məscidi niyə də olmasın?
Müzəffər məscidsiz olmaz ki! Yüzlərlə islam inanclı mömin vətəndaşı şərləyib saxta ittihamlarla həbsə at, islam üləmalarını min bir fırıldaqla zindanlara doldur, dindar insanları qurama narkotika ittihamı ilə həbs edib ailələrini çörəksiz, uşaqlarını ac-susuz qoy, milyonlarla körpə uşağı min bir ehtiyaca düçar elə və bütün bunları görən Allaha da ölkənin ən uca dağ zirvəsində Ev tik, məmləkətdə İlhahi “ədaləti” bərpa elə. Bayrağın da ən hündürünü öz bildiyi kimi tikmişdi Əliyev. Sonra məlum oldu ki, bu “vətənpərvərlik” təşəbbüsü hakim ailənin həm də korrupsiya layihəsiymiş. İndi hanı o bayraq?