Bəxtiyar Hacıyev
44 günlük Vətən müharibəsində Azərbaycan tam haqlı tərəf idi. Beynəlxalq hüquqla tanınan ərazilərimiz 30 ilə yaxın işğal altında olmuşdu, sülh danışıqlarında konstruktiv tərəf biz idik, erməni tərəfi isə gah Şuşada yallı gedərək, gah hərbi təxribatlar törədərək bizi təxribata, cavaba çəkirdi. Nəhayət Polad Həşimov kimi generalımızın şəhid olması səbr kasamızı daşırdı. Ona görə də iqtidara mənfi münasibətimizdən asılı olmayaraq, ilk gündən son günə qədər ordumuzun yanında olduq. Beynəlxalq təşkilatlar, bəzi səfirliklər bizdən iqtidara təzyiq gözləyəndə, ağızlarının üstündən vurduq, dünya dövlətlərinin nə deyəcəyi, nə edəcəyinə əhəmiyyət vermədik.
Son günlər Azərbaycan-Ermənistan sərhəd xətti boyunca yaranmış və hər gün artan gərginlik indi hamı kimi bizi də narahat edir. Hələ ki, nə rəsmi qurumlardan, nə hakimiyyətin politoloqları, deputatlarından ağıllı bir açıqlama eşitməmişik ki, orada nə baş verir? Ermənistanda seçkilərə çox az vaxt qalan zamanda Xankəndində Arayik Arutyunyan kimi müharibə cinayətkarı və digər cinayətkarları qoyub, Azərbaycan ordusunu sərhəddə yığıb, “Azərbaycan Ermənistan ərazilərinə keçdi” xəbərləri yayıb, dünyanı üstümüzə qaldırmaq kimə xidmət edir?
Erməni və Rusiyanın dəstəklədiyi saytları və bloqlarını, teleqram kanallarını, Azərbaycandakı mənbələrin dediklərini birləşdirəndə sanki belə bir mənzərə yaranır ki, Rusiya Azərbaycandan və Azərbaycan ordusundan istifadə edərək Paşinyanı Ermənistanda tam etibarsızlaşdırıb, seçkidəki qələbəsinə mane olmaq istəyir.
Bir xeyli açıq suallar var: Bizə Paşinyandan daha çox xidmət edəcək kim var Ermənistanda? Əgər doğrudan da bu gərginlik Paşinyanı baş nazir postundan kənarda qoyacaqsa, onun yerinə gələcək Rusiya kuklalarının Azərbaycana qarşı yeni qisasçı təxribatları olmayacaqmı? Dünya mediası və əksər aparıcı Qərb dövlətləri niyə Azərbaycanı Rusiya tərəfində, özü də başqa ölkənin ərazisini işğal etmiş kimi görməlidir, Ermənistanı isə işğala məruz qalmış ölkə kimi? Özü də Dağlıq Qarabağ hələ işğal altında olduğu halda. Baş verənlərin dünya mediasında niyə normal kommunikasiyası qurulmur ki, biz 30 il işğal altında olan ölkə kimi 3-5 günə işğalçı ölkə kimi tanınaq?