Milli Şuranın Koordinasiya Mərkəzinin üzvü Rafiq Manaflı
İndiyə qədər dünyada hansısa dövlətin sülhməramlısının məramını həyata keçirdiyi ölkədə hərbi parad keçirdiyini eşitmişdinizmi?
Rusiyanın Belorusda (RLS “Volqa”, 2000 nəfər), Ermənistanda (5000 nəfər), Abxaziyada (4000 nəfər), Cənubi Osetiyada (4000 nəfər), Moldovada (1500 nəfər), Tacikistanda (7500 nəfər), eləcə də Qazaxıstan, Qırğızıstan və Suriyada hərbi bazaları var. 1992-2003-cü illərdə Bosniya və Hersoqovinada 1600 nəfərlə, 1999-2003-cü illərdə Kosovoda 3600 nəfərlə “sülhməramlılıq” ediblər. Heç yerdə parad keçirməyi ağlına belə gətirməyiblər. Hətta Saakaşvili ilə konfliktin ən şiddətli vaxtlatında Putin gürcü xalqının heysiyyatına toxunmağa cürət etməyib.
Sağ olsun İlham Əliyev, təhqir etməyə, üzünə tüpürməyə Azərbaycan var. Əslində bu rus “plevoku” xalqın üzünə deyil, birinci növbədə elə onun öz üzünədir, getsin sir-sifətini yusun.
Düzü, mən son günlərə qədər inanmırdım ki, bu xalqın mənliyinə toxunacaq o parad keçirilməyəcək. Amma İlham Əliyevin “sıra düzülüşü” söhbətindən sonra aydın oldu ki, bu adam belə şeyləri başa düşmür. O yalnız evin içində canavardır, çöldə yoluq bir quzudur. Hətta o qədər üzüyoladır ki, ən azı xalq etirazlarını belə nəinki təşkil etmədi, edən müsavatçıları həbs edib etməyə imkan vermədi. Bir xalqa düşmənçilik bəs necə olur, milli xəyanətin başqa sifəti, görkəmi varmı? Bu adam bir dənə qırmızı xətt qoymadı və bununla da özü üçün dönüş yolunu qapatdı.
Gözümün önündə İlham Əliyevin körpə uşaq kimi dəmir lövhənin üstündə hoppanıb-düşməyi canlanır. Dünən Xankəndidə rus-erməni hərbçiləri parad marşı ilə Əliyevin və onunla birlikdə hamımızın, xalqımızın mənliyini tapdayıb keçdilər.
Əgər İlham Əliyev bunu anlamırsa, bir xalqın heysiyyatının nə olduğunu dərk etmirsə, onun bu xalqa başçılıq etməyə haqqı yoxdur, gedib otursun evinin bir küncündə.