Türkel Oğuz
Hökumət saytlarında Azərbaycan və Ermənistan arasında yeni sazişin imzalanacağı, həmin sazişə görə Qazağın işğal altında olan 7 kəndinin və Kərkinin Azərbaycana qaytarılacağı, habelə Zəngəzur yolunun açılacağı haqqında “şad xəbərlər” paylaşırlar.
Məgər Qazağın 7 kəndinin azad olunacağı xəbərini 10 noyabr gecəsi, bədnam, antimilli Bəyanat imzalanan gecə prezident İlham Əliyev özü bu xalqa müjdə verməmişdimi?!
Məgər Laçın dəhlizinin qarşılığında Zəngəzur yolunun (dəhlizinin də yox ha!) açılması bədnam Bəyanatın şərti deyildimi?!
Həmin Bəyanatda ermənilərin maraqlarına xidmət edən bütün bəndlər dərhal və artıqlaması ilə icra olunub. Hətta rus pisməramlıları Bəyanatın çərçivələrindən kənara çıxaraq Qarabağımızda ikinci erməni dövləti yaradırlar, biz Ermənistana və Qarabağa qaz veririk. Bəzi populistlər isə, əslində, bizdən çox Rusiyaya lazım olan Zəngəzur yolunu əlində bayraq edib “müzəffər” nağıllar uydurmaqla hökumətə yarınmağın kreativ yolunu bulub.
Bəyanatın imzalanmasından 7 ay keçsə də, ortada Azərbaycanın xeyrinə olan heç bir nəticə yoxdur. Erməni silahlıları Qarabağdan nəinki çıxarılmayıb, əksinə, yeni, müasir ordu qurulur. Laçın dəhlizi ilk gündən ermənilərin istifadəsinə verilsə də Zəngəzur istiqamətdə bir azərbaycanlının bircə addım atdığını görən olmayıb.
İndi isə eyni saqqızı yenə dövriyyəyə buraxıblar. Bəs ikitərəfli müqavilə imzalanacaq, Zəngəzur yolu açılacaq. Qorxuram ki, ermənilərlə ruslar Zəngəzur söhbətləri ilə başımızı qatıb müzəffər hökumətimizdən yenə milli maraqlarımıza zidd güzəştlər qoparsınlar.
Yəqin ki, bu baş versə, 10 noyabrda olduğu kimi yenə başımız üstündə oynanılan qorxunc oyunlardan ən sonda biz xəbər tutacağıq. Hökumət mətbuatını “Ermənistan dağılır”, “Ermənilər ağlaşırlar” və s. kimi başlıqlar bəzəyəcək. Və biz də ermənilərin sosial şəbəkələrdə “ağlaşmasından” özümüzə təsəlli bulub növbəti siyasi məğlubiyyətimizlə barışacağıq. Hətta ola bilsin ki, yenə əlimizə Rusiya bayraqları alıb küçələrə tökülüşdük…