AXCP Gənclər Komitəsinin sədri Emil Səlim
Hökumətin hazırda bütün təbliğatı sanki Şuşa üzərində qurulub. Xalqa təqdim etməyə başqa heçnələri yoxdur. Şübhəsiz ki, Şuşa bizim yaralı yerimiz, kədərimiz, niskilimiz idi. Onun azadlığı hamımıza böyük qürur, sevinc yaşadıb. Atəşkəsdən sonra Şuşa, həm də Qarabağın bir incisi kimi digər parçalarla tamamlanmağını gözləyir. Şuşa həm də Dağlıq Qarabağın bütövlükdə azadlığı üçün hərbi-strateji uğurumuz hesab olunur.
Bəs Şuşa və Şuşalılar ücün gözlənilən ədalət bərqərar olubmu? Şuşalılar hələ də öz ata yurdlarının həsrətindədirlər. Şuşanı və digər işğaldakı əraziləri bizə canı bahasına yenidən qazandıran hərbçilərimizin, qazilərimizin, şəhid ailələrinin fəryadı qulaq ardına vurulur.
İlham Əliyev müharibə vaxtı qazandığı müvəqqəti reytinqini yenidən qaytarmaq istəyirsə, bunun yolu Şuşanı özəlləşdirmək olmamalıdır. Əvvəla Şuşaya ən qısa zamanda ədalət gətirib onu sahiblərinə qaytarmadan qürurlanmaq əbəsdir. Azərbaycanımız isə bütövlükdə öz azadlığını gözləyir. Hələ də bu ölkədə şah özü qanundur. İllərdir ölkəmizi “Qarabağ boyda dərdimiz var” bəhanəsilə talayıb, hüquq və azadlıqları boğmaqla məşğul olublar. Yaxşı, bəs münaqişə bitibsə, niyə ölkədə xalq günbəgün daha da kasıblaşır, məmurlar isə əksinə varlanır, rejim daha da sərtləşir? Yox, əgər problem qalırsa(!), niyə “münaqişə bitib” təblığatı aparılır?
Xankəndinin, Xocalının və digər ərazilərimizin taleyilə bağlı suallarımıza cavab verən olacaqmı?