Milli Şuranın Koordinasiya Mərkəzinin üzvü Gültəkin Hacıbəyli
Azərbaycan insanının sosial durumunun hədsiz dərəcədə ağır olması heç kim üçün sirr deyil. Neft və milyardlar səltənətində minimum əməkhaqqı 2019-cu ilədək 130 manat , yəni, 76 dollar idi. Bu, günə 2,5 dollar təşkil edirdi.
Dünya üzrə yoxsulluq, kasıblıq yox ha, məhz yoxsulluq, səfalət göstəricisi olaraq günə adambaşına 3 dollardan, aya 90 dollardan aşağı gəlir hesablanır. Təkcə 200 milyard dollar miqdarında neft sərvətini həzmi-rabeədən dədə malı kimi rahatlıqla keçirmiş YAP rejimi isə 2019-cu ilədək 600 mindən çox vətəndaşına günlük 2,5 dollar!!! əməkhaqqı verirdi! Bu qədər anti-milli, antiinsani, antibəşəri olmaq üçün mütləq cibində YAP bileti daşımalısan!
Yalnız 2019-cu ildə Milli Şuranın təşkil etdiyi 19 yanvar mitinqində xalqımızın qəzəb və hiddətini əyani şəkildə görən iqtidar qorxusundan minimum əməkhaqqını öncə 180, sonra 250 manatadək artırdı.
Bu, hazırda 147 dollar vəsait edir. Nəinki Avropada, heç Rusiya və Gürcüstanda belə aşağı əmək haqqı yoxdur və buna görə utanıb xəcalət çəkmək lazımdır!
Qazisi 300 manat müavinət alan, çox vaxt onu da ala bilməyən, işləyən əhalisinin böyük əksəriyyəti 347 manatdan az əmək haqqı alan, 600 mindən çox vətəndaşın 250 manatlıq minimum əməkhaqqının ümidinə yaşamağa yox, sürünməyə məhkum edildiyi dövlətdə yaşayanlar da var axı! Onlar kimdir?! Bax, indi bunu araşdıracağıq.
Ölkədə iki paralel dünya mövcuddur. Biri hakimiyyətin ətrafında formalaşan 3-5 faizdir. Bu kateqoriyaya millət vəkilləri, iribuynuzlu məmurlar, hakimlər, hüquq-mühafizə orqanlarının əməkdaşları, dövlət orqanlarında çalışanlar, yaltaq və prezident təqaüdü alan ziyalılar, zurnalistlər və s. aiddir. Onların işi hakimiyyətin cinayətlərinə haqq qazandırmaqdan və hakim ailəyə yaltaqlanmaqdan ibarətdir. Bu zümrə qarşılığında lüks həyat yaşayır, övladları hərbi xidmətə getmir, 44 günlük savaşda birinin oğlu iştirak etmədi, sıralarından bir nəfər şəhid, qazi yoxdur, ancaq savaş günlərində qaçıb gizləndikləri Londondan, Dubaydan… sosial şəbəkələr üzərindən şəhidliyin necə yüksək məqam olduğunu, İlham Əliyevin ömürlük prezidentliyi haqq etdiyini, Rusiyanın bizə əbədi dost və qardaş olduğunu dil-boğaza qoymadan təbliğ edirdilər.
Bədnam 10 noyabr Bəyanatı ilə Qarabağ Rusiyaya təslim ediləndə də 200-300 minlik avtomobilləri ilə karantin vaxtı, gecədən səhərədək Rusiya bayraqları ilə meymunluq edənlər onlar idi.
Gəlin görək minimum əməkhaqqının 147 dollar təşkil etdiyi, qazilərin 300, şəhid ailələrinin 500 manat müavinət aldığı həmin “ağ insanların” rəsmi gəlirləri nə qədərdir?!
Millət vəkillərinin aylıq gəliri 6-7 min manatdır.
Hakımlərın aylıq əməkhaqqı 4-6 min manatdır.
Prokurorluq orqanı əməkdaşları bir ay öncə baş tutmuş son artımdan sonra 4-7 min civarında əməkhaqqı alırlar.
Ən yüksək maaş Prezident Administrasiyasındadır. Burada çalışanlar ayda 8-10 min manatadək əməkhaqqı alırlar! Və təkcə əməkhaqqı deyil!
Bilirsinizmi ki, küçədə yol hərəkəti qaydasını pozduğunuza görə ödədiyiniz cərimənin 25 faizi polis orqanları əməkdaşlarının, 5 faizi isə Prezident Administrasiyasında çalışan məmurların əməkhaqqına əlavə olaraq artırılır?!
Niyə?! Nə üçün 250 manat minimum əmək haqqı, 347 manat orta əməkhaqqı alan vətəndaş az qala maaşının yarısı həcmində yüksək cərimə ödəməlidir və ödədiyi cərimənin 25 faizi ondan 5 dəfə çox əmək haqqı alan polis orqanları, 5 faizi isə ondan 30-40 dəfə çox aylığa imza atan “kasıb” Prezident Administrasiyası işçilərinin əmək haqqına artırılmalıdır?! Niyə?! Nə üçün?! Məgər Azərbaycan vətəndaşları ağlara və qaralara bölünüb?! Məgər Azərbaycanda birinci və ikinci sort insanların bölgüsü rəsmiləşib?! Məgər ölkədə Aparteid rejimi hökm sürür?!
Məni sındırmaq, diktarura rejimi ilə mübarizədən yayındırmaq üçün başıma açmadıqları şərəfsizlik, əxlaqsızlıq qalmadı. Evimə, maşınıma həbs qoydular. Üzümə insan alverçilərini qoyub məhkəmədən saxta, əsassız qətnamə çıxardılar. Evini itirməmək məcburiyyətində qalıb 85 min manatı ödədim. Buna baxmayaraq əmlakımı heç bir əsas olmadan bir aydır həbsdə saxlayırlar. 4 məhkəmə iclası olub, hələ “araşdırırlar”. Əslində, borcun ödənməsilə əmlak dərhal həbsdən çıxmalı idi, amma sən demə başqa bir əmma da varmış!
Ədliyyə Nazirliyi nəzdində İcra məmurlarının əmək haqqı fondu yaradılıb və sən demə borclu borcun 7 faizi miqdarında vəsaiti də “yetim” Ədliyyə Nazirliyinin fonduna köçürməlidir. Niyə?!
İcra Haqqında qanuna görə borclu yalnız üzürsüz səbəbdən borcu ödəmədikdə bu pul tutulur, ancaq reallıqda nə üzrlü, nə üzürsüz səbəbə baxmırlar. Mən “üzrsüz səbəbi əsasladırmalısınız” tələbini irəli sürəndə, icra məmuru da, hakim də “praktikada 7 faiz hamıya tətbiq edilir” dedilər. Hətta Nəsimi Rayon İcra şöbəsinin qanacaqsız məmurları “evinizi satın, bizim 5950 manatı ödəyin” demək kimi tərbiyəsizliyi də özlərinə sığışdırdılar.
Bəli, gerçəklik budur. 70 faizi işsiz olan, işləyənlərinin 70 faizi 347 manatdan az əmək haqqı olan, 600 minindən çoxu 250 manat minimum əməkhaqqı alan Azərbaycan vətəndaşları evini satıb Ədliyyə Nazirliyinin İcra Məmurlarının əməkhaqqı Fonduna, Prezident Administrasiyası, Daxili İşlər Nazirliyi əməkdaşları fonduna pul ödəməlidir ki, 2-5-8 min manat əməkhaqqı alan bu “yetim-yesir” acından ölməsin, daha yaxşı yaşayıb xalqı daha böyük enerji və motivasiya ilə talasın, ağnasın, məhv etsin.
Bunların ofşor hesablarda yüz milyardlarla vəsaiti ola bilər, onlarla Boeingi, Gulfstreami ola bilər, ancaq nə fayda?! Rəhmətlik atam deyərdi ki, qızım, bunlar genetik aclardır, bunların gözünü bu dünyanın var-dövləti doyura bilməz…
Mənim bu dilənçi yığınına deməyə sözüm yoxdur. Ancaq heç şübhəm yoxdur ki, onlara iliyini, qanını sümürüb zəlil gününə saldıqları xalq tezliklə öz sözünü deyəcək. Özü də çox sərt şəkildə deyəcək. Az qalıb…