Milli Şuranın Koordinasiya Mərkəzinin üzvü Rafiq Manaflı
Keçən il noyabrın 26-da yazdığım statusu bir daha paylaşıram. Bəlkə İlham Əliyevə çatdı, bəlkə oxudu, bəlkə nəticə çıxardı ki, Sarkisyankimilərin yanında bizi üzüqara etməsin. Ağzına yiyəlik etsin ki, növbəti dəfə Koçaryandan-zaddan biri onu yıxıb sürüməsin.
Ritorika – sözün köməyi ilə insanların dünyagörüşünü formalaşdıran təsirli vasitədir. Aristotel sözü insanın ən güclü silahı adlandırmışdı. Bu sırada Prezidentlərin ritorikası xüsusi yer tutur. Hər bir Prezidentin çıxışından, müraciətindən, bəyanatından sonra ölkədaxili və ölkəxarici siyasi, iqtisadi, hərbi güclər hərəkətə gəlir, tribunalar dolub-boşalır, silahlar anbarları tərk edir, yaxud anbarlara qayıdır, birjalar qaynayıb-daşır, aksiyalar enib-qalxır, kimlərsə bir anda milyardlar itirir ya da qazanır. Həyatın axarı dəyişir. Ona görə prezidentlərin hər bir publik çıxışı yüz ölçülüb bir biçilir, nəinki hər bir söz, hər bir intonasiya xüsusi əhəməyyət kəsb edir. Çünki o çıxış cəmiyyəti konsolidasiya da edə bilər, tikə-tikə də parçalayar.
Bizim ölkənin prezidenti də danışır və qurtaran kimi hərəkətlər başlayır – polis dubinkaları texosmotrdan keçirilir, falaqqalar, taxt-taclar yağlanıb sazlanır, işkəncə kameralarının video kameraları nizamlanır.
Ölkə müharibə vəziyyətindən çıxır. Qəhrəman ordumuzun zəfərli yürüşünü idraksız və iradəsiz siyasilərin qəfil dayandırması çoxlu suallar, müəmmalar doğurub və bunlara zaman keçdikcə aydınlıq gələcək. Heç nə səssiz-izsiz batıb getmir. Müharıbənin gedişində vəzifəsi xalqı konsolidasiya etmək olan prezident dəfələrlə müxalifəti qarşıdurmaya təhrik etdi, amma müxalifət liderləri böyük səbat göstərərək ordumuza və dövlərimizə dəstəklərini bir an əsirgəmədi, qarşıdurmaya heç bir bəhanə vermədi.
Və nəhayət, ordumuzun Kəlbəcəri qaytardığı bu gözəl gündə İlham Əliyev öz təbrik nitqi ilə pütün nöqtələri yerbəyer etdi. 32 dəqiqəlik çıxışın 8 dəqiqəsi müxalifəti söyməyə həsr edildi, küçə ifadələri ilə. Görünür MİMO-nun verdiyi səviyyə bundan ibarətdir, dil bilməklə deyil ki. Pompeo ümumiyyətlə ingilis dilindın başqa heç bir dil bilmir.
İttihamları da özünə layiqdir – “laxlamış hakimiyyəti möhkəmləndirmək, repressiyalar təşkil etmək, senzura tətbiq etmək, öz ciblərini doldurmaq, yaxın adamlarını vəzifələrə təyin etmək”. Bu sözləri arvadını birinci vitse-prezident təyin edən bir adam söyləyir. Landromatların, Panamaqeytlərin, Vikiliksin baş qəhrəmanı olan bir ailənin başçısı deyir. Daxilində bir müstəqil jurnalist qalmayan, türmələri siyasi dustaqlarla dolu bir ölkənin başçısı bəyan edir.
Kadrlara gəldikdə isə, məsələn, MİMO təhsilli diplomat bilməlidir ki, çox ölkələrdə müdafiə naziri mülki postdur. Orduya hərbçi, baş qərərgah rəisi başçılıq edir. Və 27 il satqın olduğunu bilə-bilə Nəcməddin Sadıqovu, onun özünün təbirincə desək “baş girqax raisi” postunda saxlamaq siyasi naşılıqdır, dövlətə düşmənçilikdir. Elə bir adamı ki, bu qədər zəngin dilimizdə “girmək” sözündən başqa bir söz öyrənməyi özünə rəva bilməyib.
Xarici siyasəti iflas bir prezidentin xarici siyasətinin piki isə rus ordusunun torpaqlarımıza qayıtması oldu. Ordumuzun zəfərini zorlayaraq. Fransa senatı “Dağliq Qarabağın müstəqilliyini tanımaq haqda” bu gün qəbul etdiyi qərarı Əbülfəz Elçibəyin və Tofiq Qasımovun idarəçiliyində qəbul edə bilməzdi.
Bir çox adamlarda müharibədən sonra ilə aşırı optimist ümidlər yaranmışdı. Bəzi sadəlövh demirəm, Əliyevə haqq qazandırmağa nə isə tapmaq üçün əlində iynə gor eşənlər qələbədən sonra siyasi münasibətlərin dəyişəcəyi ilə bağlı dil-boğaza qoymurdular. Əliyev nöqtə qoydu.
Bu ölkədə heç nə dəyişməyəcək, nə qədər ki, Əliyev dəyişməyib.