2-ci Qarabağ müharibəsinin iştirakçısı Qulu Məmmədli
Bizdən sol istiqmətdə yerləş dağa hücuma keçən ordumuzun bölmələrini aramsız şəkildə düşmən artileriyası mina atan mərmilərlə vurmaqdadır. Hər mərmi sanki mənim üzərimə düşürmüş kimi çox narahat hiss edirəm özümü.
Rəşadla dünəndən heç bir əlaqə yoxdur. Düşmən əsgərlərinin qarhaqur səslərlə müşayət olunan ardıcıl hücumları və onlara dəstək verən ağır artilleriyası oradan kiminsə sağ çıxmayacağı qənaəti yaradır adamda. Kaset mərmilərin hər partlama anında sadəcə bir şey düşünürəm: Rəşadı bir də görməyəcəyəm.
Rəşadla facebook üzərindən dostluğumuz müharibədən öncəyə təsadüf edir. Eyni siyasi partiyada təmsil olduğumuzdan bir-birimizi qiyabi də olsa, tanıyırıq.
Amma bir-birimizi əvvəldən tanıdığımızı, eyni siyasi düşərgədə olduğumuzu, mitinqlərdə bir yerdə olduğumuzu isə ta müharibənin sonunda bir təsadüf nəticəsində öyrənə bilirik.
“Əzik” Şirvan ləhcəsi ilə, sözləri bir az da “qaynadıb” tələffüz edən qaynargözlü zabit diqqətimi daha çox cəlb edir. Bu insanı haradansa tanıdığımı düşünsəmdə bir nəticə hasil edə bilmirəm. Daha çox ünsiyyətçil zabit olan bu şəxs də mənə qarşı isti davranır. Amma bu istiliyin haradan qaynaqlandığını heç özümüz də bilmirik.
Bir dəfə təsadüfən onu öyrənə bilmişdim ki, əmimlə iş yoldaşı olublar Şirvanda.
İmkan olduqca taburun həkimi Quluzadə Elmdar, baş leytenant Həsənovla bir yerdə dərdləşirik. Elmdarın baməzə lətifələri, Rəşadın Şirvan ləhcəsi ilə “bıra baa” ilə başlayan isti söhbətləri məni daha çox çəkir. Bu ortamda özümü daha rahat hiss edirəm.
Qubadlının Ermənistanla sərhəddində, ən son nöqtəsində yerləşən dağ zirvəsi uğurunda oktyabr ayının 26-dan noyabr ayının 3-nə qədər gərgin döyüşlər gedir. Sərhəd xətti demək olar ki, dağın zirvəsindən keçir. Düşmən dağı tərk etmək niyyətində deyil. Ard-arda şəhidlər veririk, düşmən itkiləri isə saysızdır, amma mənfur düşmən ərazini tərk etmək istəmir ki, istəmir.
Rəşad əvvəlcədən hazırladığı qrupla bir neçə dəfə baş vermiş toqquşmadan sonra yola salınan növbəti qrup komandiri kimi həmin əraziyə döyüş tapşırığını yerinə yetirməyə gedib. Əvvəlcə rabitə ilə əlaqə saxlamaq mümkün olsa da, sonradan onlarla tam əlaqə kəsilib.
Oktyabrın 26-da götürdüyümüz dağın düşmən istiqamətində olan yamacının düz orta hissəsində Şəhri Yar la bir mövqedə maskalanıb, düşmənin hərəkətini izləyirik. Qəhrəman Şəhriyar qardaşımla demək olar bir həftə boyunca bu mövqedə gecə-gündüz taburun ən təhlükəli cinahını qorumağa müyəssər olduq. Kəndisi çox mədəni, səmimi, qorxmaz bir əsgərdir. Yerləşdiyimiz mövqeyi isə bir gecə səhərə qədər zorla qazıb yerləşə bilmişdik. Buradan böyük bir ərazini müşahidə altında saxlaya bilirik. İlk dəfə yerləşdiyimiz ərazini yabanı otlarla, tikanlarla maskalaya bilmişdik. Düşmənin açıq hədəfində olduğumuzdan bu bir həftənin necə keçdiyini hər dəfə təəccüblə qarşılayıram. Gün yarıya qədər qalxana qədər uzaq görməmlə bağlı problemim üzündən taxdığım eynəyi taxa bilmədiyimdən, ərazinin müşahisədini Şəhriyar həyata keçirir. Ancaq hansısa təhlükə baş verən zaman cəld arxada yerləşən bölməmizə xəbər vermək üçün bu mövqeyi tərk edirdik.
Daha bir bölmə Rəşadın arxasıyca dağa yola salınır. Mina atan mərmiləri kolon şəklində hücuma keçən bölməmizin düz yaxınlığına mərmilər yağdırmağa başlayır. Kolon pozulur, yenidən bir müddət sonra hücum davam etdirilir.
“Öldü var, döndü yoxdur” ifadəsini tam çılpaqlığı ilə müharibə zamanı praktiki olaraq yaşadıq. Azərbaycan ordusu bu müharibə boyunca, ən azından özümün şahidlik etdiyim hərbi əməliyyatların heç birində daimi geriyə bir addım da atmad. Bir dəfə də olsun bir addım geriyə çəkilmədən müharibə boyunca irəlilədik. Yaralandıq, şəhid olduq, amma geriyə bir addım da atmadıq.
Rəşad qalxan dağdan acı xəbərlər gəlməkdə davam edir. Şəhid yaralılarımız var. Asfalt yolla şəhid, yaralı götürməyə gələn avtomobillər biz yerləşən istiqamətdə yaxınlaşmağa macal tapa bilmirlər.
Şər qarışana doğru xışıltılı səs rabitə qurğusunun mikrafonunu silkələməyə başlayır. “Biz olan dağı vırın, biz qarışıq vırın buranı”.
“Danışan Rəşaddır, bıranı vırın”.
Çox sayda düşmən bölməsinin onu mühasirəyə almasını görüb, son dəfə batareykası dünəndən bitmiş rabitəni açıb, ən axırıncı istəyini dilə gətirir. Bu həyatla ölüm arasında olan ən son arzu, ən son diləkdir.
“Sən yerləşdiyiniz yerin kordinantını de” deyə, artilleriya bölməsinin komandiri tələskənliklə onu sanki fikirindən döndərməyə çalışır. Az sonra arxa istiqmaətlərimizdə yerləşən artilleriya bölmələrinin aramsız atışları kainata səs salır. Güllə gülədir, amma o sənə dəstək üçün atılanda sanki adama dünya bağışlanırmış kimi hisslər yaşadır.
Axşama doğru hissin-pasın içində, uzaqdan qaynar gözləri işıldayan, təbəssümlə bir-bir bizimlə görüşən adamın adı Rəşaddır. Şəhriyarla yerləşdiyimiz dağa əlavə qüvvələr cəmləşməyə başladığından fürsətdən istifadə edib biz də taburun dayaq məntəqəsinə gəlmişik.
Sanki 10 illərdir bir-birimizi görmürmüş kimi bir-birimizə sarılırıq. “Axı, sən necə qayıtdın?”- sual edirəm. Gülümsəyərək, “pis adama heç nə olmur”- deyən, adamla gözlərimiz yaşla dolana qədər sevinclə bir-birimizi qucaqlayırıq.
Müharibə müddətində bir dəfə evlərinə şəhid xəbərini də vermişdilər Rəşadın. Qış gödəkcəsini taburumuzun qərərgah rəisi Kapitan Orucov Elşənə veribmiş necəsə. Kapitan Orucov şəhid olan zaman əynindəki gödəkçənin ciblərinə baxıb kimliyini müəyyən etmək istəyiblər. İsimlikdə Həsənov Rəşad, gödəçənin cibindən Rəşadın nömrələr yazdığı bloknot çıxır. Evlərinə zəng edib Rəşad şəhid olub, vətən sağ olsun deyiləndən 3 gün sonra Rəşad evlə əlaqə saxlayır. Bu hisslərin nə olduğunu, necə olduğunu aydınlatmaq üçün zəng olunan adamlardan sual etmək, müharibənin dəhşətlərini daha aydın şəkildə aydınlada bilər hər halda.
Müharibə çox acıdır, amma bu acılar içində çox dəyərli, ləyaqətli, vicdanlı insanlarla qarşıladırır adamı. Bu tərəfinə görə bəlkə də nə qədər də lənətlik olsa da, müharibəyə də bir minnətdarlıq borcu doğur içində. Həm də axı, bu müharibə bizdən ötəri ədalətli idi. İstənilən halda bir də müharibə acısı, xəbəri qismət olmasın bu xalqa. Ölkəmiz azad, firavan, demokratik bir məmləkətə dönüşsün. Zəhmətkeş, əzablarla tarix yazmış dəyərli vətəndaşlarımız ağ günə çıxsınlar nəhayət. Üçrəngli bayrağımız var olsun hər zaman.
Allah şəhidlərimizə rəhmət eləsin. Onların müqəddəs ruhları qarşısında baş əyirik. Onları böyüdüb, boya-başa çatdıran anaların əllərindən öpürük, atalarını, övladlarını bağrımıza basırıq. Biz ölüb gedəcəyik, onlar isə daima bu xalqın yaddaşında, qəlbində, vətənin hər bir qarışında yaşayacaqlar sonsuzadək.