Hüquq müdafiəçisi Anar Məmmədli
Bir il öncə cəbhədə qızğın döyüşlər gedərkən, çox az adam postmüharibə dövrünün sosial çətinlikləri barədə düşünür, qayğılarını bölüşürdü. Müharibə ideal şəkildə olmasa da, bizim üçün əlverişli siyasi üstünlüklə bitdi. İndi isə ölkə olaraq iqtidarın sosial qayğıları həll etmək əvəzinə siyasi üstünlüyü primitiv və bayağı şəkildə sui-istismar etməsinə şahid oluruq.
Müharibədə zərəçəkmiş, fiziki sağlamlığını itirmiş qazilərlə bağlı hələ də doğru-dürüst sosial proqram icra edilmir. Bu barədə dəqiq statistik məlumat belə açıqlanmır. Çoxmu çətindir?!
Müharibədən bir il keçsə də, hələ də məcburi köçkünlərin qayıdış planıı, infrastruktur layihələrinin icrası, tikinti-quruculuq prosesinin təyinatı və xərclərinə dair şəffaflıq və hesabatlılıq təmin edilmir. Amma hər həftə hansısa hökumət rəsmisi Şuşaya gedib selfi çəkdirir, ordan açıqlama verir. Ən acınacaqlısı isə bu bayağı siyasi kampaniyada çoxluğun həvəslə iştirakdır.
Məsələn, hamı bilir ki, işğaldan azad edilmiş rayon və şəhərlərdə tikinti-abadlıq işləri, xüsusən ərazilərin minalardan təmzilənməsi müəyyən zaman alacaq. Məntiqlə bu müddətdə həmin ərazilərə yalnız fövqəladə məqsədlər və ya tikinti-quruculuq prosesi üçün məsul olan şəxslər səfərlər etməlidir. Bəs hər həftə Prezident Administrasiyasının xəttilə ora təşkil olunan “ekspedisiya” turları nəyə xidmət edir?
Bakıdan Şuşaya təxminən 390 km məsafədir. Olmazmı ki, hər bir siyasi partiya, ictimai birlik və ya media təmsilçisi ora öz şəxsi hesabına getsin? Əgər fərdi səfərlər təhlükəlidirsə, kollektiv turlar niyə təhlükəsizdir?
Ümumiyyətlə, ağıllı-başlı adamlar bu cür primitiv siyasi kampaniyada iştirakı özlərinə necə rəva bilərlər?!
Bilirsiz bu nəyə bənzəyir? Çörək növbəsində tanış tapıb “bez oçered” qabağa keçməyə. Minlərlə köçkün Şuşaya və digər bölgələrə səfər etmək istəyir, amma bir neçə nəfərin tapşırığı ilə bir dəstə adam “növbəsiz” ora aparılır. Yaxşı olar ki, bunun da mədəni bir forması tapılsın.