КИТОБ ТУМАНИДА ҲОКИМ ЁРДАМЧИСИ ПИЧОҚЛАБ ЎЛДИРИЛДИ

2025 йил 19 июнь куни кечқурун Қашқадарё вилояти Китоб тумани Янгиобод маҳалласи ҳоким ёрдамчиси Самадов Фаррух пичоқлаб ўлдирилди. Унинг жанозаси 20 июнь куни тушлик пайти ўтказилди.

Маълумотларга кўра, воқеа кеча кечқурун маҳаллий кафеда содир бўлган. Самадов Фаррух у ерда ҳамкасблари ва бир неча қассоб тадбиркорлар билан учрашган, еб-ичиш пайтида жанжал келиб чиққан ва натижада ҳоким ёрдамчиси пичоқлаб ўлдирилган.

Ҳозирда ҳодиса бўйича ҳуқуқни муҳофаза қилувчи органлар тергов ишларини бошлаганлар.

Айтишларича, Самадов Фаррух пичоқланган пайтда Китоб туманидаги барча раҳбарлар, ички ишлар ходимлари ва профилактика инспекторлари Шаҳрисабз шаҳри ва Мираки шаҳарчасида ўтказилаётган Президент ташрифига тайёргарлик тадбирларига жалб этилган бўлган. Шу боис, Китоб туманида қонун устуворлигини таъминловчи мутасаддилар бўлмаган.

Маҳаллий аҳоли бу ҳолатдан ташвишда. Улар Президентдан Китоб туманига ҳам ташриф буюришларини сўрашмоқда.

Шунингдек, яқинда Китоб тумани Чармгар маҳалласи профилактика инспектори Ғаниев Ҳикмат фуқаронинг ишини судга олиб чиқмаслик эвазига 500 доллар пора олаётган пайтида қўлга олинган эди. У бир ҳафтадан буён ҳибсда сақланмоқда.

Кузатувчилар фикрича, туманда назоратнинг сусайиши катта муаммоларга олиб келмоқда.