Зойир Мирзаев америкалик йирик компания вакиллари билан учрашди

Тошкент вилояти ҳокими АҚШнинг “Becker & Poliakoff” компанияси вакиллари билан учрашди.

Тошкент вилояти ҳокими АҚШнинг нуфузли юридик ва лоббистик компанияларидан бири — “Becker & Poliakoff” вакиллари билан учрашув ўтказди. Суҳбат давомида ҳоким вилоятнинг иқтисодий ва инвестицион салоҳияти ҳақида маълумот берди.

Учрашувда таъкидланишича, Тошкент вилояти мамлакатда тўғридан-тўғри хорижий инвестициялар жалб этиш бўйича етакчи ҳудудлардан бири бўлиб, 2024 йилда вилоят иқтисодиётига 5,5 миллиард долларга яқин инвестиция киритилган.

Ҳоким вилоятдаги эркин иқтисодий зоналар, солиқ ва божхона имтиёзлари, замонавий инфратузилма ҳамда маъмурий енгилликлар инвесторлар учун кенг имкониятлар яратаётганини қайд этди.

“Becker & Poliakoff» компаниясини стратегик ҳамкор сифатида кўрамиз. Бу ҳамкорлик америкалик инвесторлар учун Ўзбекистон бозорида янги имкониятлар очади”, — деди ҳоким.

Учрашув якунида томонлар келгусидаги аниқ инвестицион лойиҳалар ва ҳамкорлик йўналишларини муҳокама қилишга келишиб олдилар.