Ўзбекистоннинг қишда зулматга чўмишига қуёш айбдорми?

Ўзбекистон Энергетика вазирлиги мамлакат бўйлаб электр таъминотида эҳтимолий узилишлар юзасидан огоҳлантириш билан чиқди. Унда билдирилишича бунинг асосий сабабларидан бири қуёшли кунларнинг камайиши билан боғлиқ.

Вазирликнинг изоҳида айтилишича: «қуёшли кунларнинг қисқариши ортидан қуёш фотоэлектр станцияларидан электр энергияси ишлаб чиқариш ҳажми камайган. Шу боис, электр энергиясини ишлаб чиқариш ва истеъмол балансини тартибга солиш, уларнинг мувозанатини сақлаш мақсадида айрим ҳудудларда асосан юқори истеъмол даврларида (17:00 дан 21:00 гача) қисқа муддатли электр таъминотида узилишлар кузатилиши мумкин»

Энергетика вазирлигининг тағин изоҳ беришича, энергетика тизимидаги узилишларнинг сабабларидан яна бири Сирдарё ИЭСидаги таъмирлаш ишлари билан боғлиқ. 

Бу ҳақда хабар берган Ulysmedia.kz муаллифи Аскар Жакиповга кўра, станциядаги 2-сонли газ турбинасида ротор алмаштириш ишлари олиб борилмоқда. Мазкур таъмирлаш ишлари тахминан бир ой давом этиши кутилмоқда.

Бундан аввал 5 декабрь куни Ўзбекистонда ишга туширилган янги энергетика объенктлари мамлакатнинг ички истеъмолини тўлиқ қоплаши ҳақида баёнот берилган эди. Бироқ, юзага келган вазият юқори минбарлардан туриб айтилган гапларнинг реал ҳақиқатга тўғри келавермаслигини кўрсатмоқда.