Жиззахда диний экстремист гуруҳ қўлга олинди

Жиззах вилоятида экстремистик мазмундаги тақиқланган материалларни тарқатиш билан шуғулланган гуруҳ фаолиятига чек қўйилди. 

Маълумотларга кўра, Тошкентдаги олий таълим муассасаларидан бирида таҳсил олувчи 24 ёшли талаба 23 ёшли йигит билан биргаликда Telegram ижтимоий тармоғида гуруҳ ташкил этган. Улар ушбу гуруҳда диний мазмундаги, диний-экстремистик оқимлар ва халқаро террорчилик ташкилотлари мафкурачиларига тегишли бўлган тақиқланган аудио ва видеоматериалларни жойлаштириб келган.

Гуруҳга тахминан 18 нафар шахс жалб этилган бўлиб, улар экстремистик ғояларни муҳокама қилган ва тақиқланган контентларни ўзаро  алмашган. Ҳуқуқни муҳофаза қилувчи органлар диний экстремистик, сепаратистик, фундаменталистик ёки бошқа тақиқланган ташкилотларни тузиш, бошқариш ёки уларда иштирок этиш айблови билан тўққиз нафар шахсни ҳибсга олди, етти нафар фуқаро билан профилактик суҳбатлар ўтказилди.

Элтуз хабар берганидек, аввалроқ Қўқон шаҳрида ДХХ ходимлари томонидан диний радикаллар гуруҳи қўлга олинган эди. Улар асосан «Халифат» тузиш ғоясини тарғиб қилиб, Сурияга пул маблағлари жўнатиб турган.