Blind Sherlock: Чет эл фильмидаги жиноятчи ўзбек қиёфаси

Ўзбекистонлик фаол Фарида Шариф ўзининг янги блогида «Сўқир Шерлок» яъни Блайнд Шерлок детектив сериалини томоша қилгани ва таассуротлари ҳақида ёзди.

Фильмдаги асосий икки жиҳат унинг эътиборини тортган:

 1. Фильм Роттердам полициясининг «Ўзбек Битлз» лақабини олган ўзбек мафияси бандитлари сурувига  қарши кураш ҳақида. Бу бандитлар ролида бир нечта ўзбек актерлари иштирок этган. Масалан мафия рахбари ролини Жавохир Зокиров ижро этган.

2. Фильм Белгияда ҳақиқатан бўлган воқеаларга асосланган. Яъни бу ҳаётда ҳақиқатан яшаган кўзи ожиз полициячи ҳикояси ва бу ролни ҳақиқатан кўриш қобилияти заиф бўлган актер ижро этган.

Фильмни Голландия кино усталари суратга олган ва ўзбек блогери ўша сўқир полициячи ва бу ролни ўйнаган кўриш қобилиятини йўқотган актернинг жамиятда ўз ўрнини топганига эътибор қаратади.

Мен бутунлай бошқа жиҳати ҳақида гапирмоқчиман. Бу фильмда кўринган ўзбеклар ҳақида чет элларда пайдо бўлаётган тассаввур ҳақида.

Узбек жиноятчи, ўзбек каллакесар, ўзбек ўғри, аврат қоровули ва муттаҳам.

Бугун ижтимоий тармоқни варақларкан, ўзбеклар ҳақида яхши бир хабарни кам учратамиз. Масалан сўнгги воқеаларни олайлик, куни кеча бизга энг яқин қардош бўлган Туркияда жиноятчи ўзбекларга қарши намойишлар бўлди.

Россия урушида қатнашаётган қотил ўзбекларнинг сон саноғи йўқ. Айни пайтда тармоқнинг ўзбек сегменти ҳам ўғрилар дунёсини улуғлайди, қоидасиз жанг спортига, аёл ва эркакларнинг авратига қизиқади ва бошқа мавзулар санъат ва маданият ривожига деярли яқинлашмайди.

Мана сизга кўринмаган, бироқ белгиялик сўқир полицияси кўрган ўзбек қиёфаси.

Қудрат Бобожон