Гадонинг душмани…

Ҳа, гадонинг душмани гадо,

Лекин лаънат душман гадойга.

Қавми билан нафрат бобида

Қилаверса жирканч бир пойга.

Гадоликни тарғиб этганлар

Ўз қавмини ўзи қопдилар.

Нима бало, не офат топса,

Аввал ўзларидан топдилар.

Нега ҳар хил туҳмат ёрлиғин

Ҳалол меҳнат бойларга тақмоқ?

Душман бўлмас донога доно,

Душман бўлар аҳмоққа аҳмоқ.

Уммон каби яшанг гувиллаб,

Дарёлардек оқиб яшанглар.

Унутманглар, бой бойга боқар,

Бир-бирингга боқиб яшанглар

Матназар Абдулҳаким