НамДУда вазирлик текширувидан кейин ҳам муаммолар ҳал этилмади

Наманган давлат университетида (НамДУ) уруғ-аймоқчилик, ноқонуний тайинловлар ва молиявий қонунбузарликлар ҳақидаги шикоятлар яна давом этмоқда.

Илгари Элтузга йўлланган мурожаатда университетдаги тендердаги қонунбузарликлар, бюджет маблағларини самарасиз сарфлаш ва кадрлар масаласидаги адолатсизликлар ҳақида маълум қилинган эди.

Ўша шикоятдан сўнг вазирликдан ишчи гуруҳ текширув ўтказган, аммо мурожаатчилар бу текширув кутилган натижани бермаганини таъкидламоқда. Улар вазият яхшиланиш ўрнига, ректор С.Турғунов ўз одамларини ҳокимиятда янада мустаҳкамлаш имкониятига эга бўлди деб ҳисобламоқда.
Янги шикоятда айтилишича:

– Биринчи проректор Н.Деҳқонов ишдан кетишга мажбурланган, унинг ўрнига ректорнинг ҳамқишлоғи И.Одилов тайинланган.
– Ёшлар етакчиси Ш.Султонов ҳам ишдан четлатилиб, унинг ўрнига яна ректорга яқин шахс – Ҳамидулло лавозимга келган.
Коррупция, тендердаги қонунбузарликлар ва молиявий текширув ўтказилмаган.
– ДХХнинг университетдаги вакили Алибек бу вазиятга ҳеч қандай муносабат билдирмаяпти.

Шикоятчиларнинг таъкидлашича, Президент селекторида НамДУ ректори лавозими масаласи муҳокама қилинган ва у ишда қолиш қолмаслиги масаласи кўриб чиқилмоқда.

Университет жамоасининг катта қисми, айниқса, спортчи ўқитувчилар бу хабарни хурсандчилик билан қабул қилган.
Шу билан бирга, мурожаатчилар ректор атрофидаги «содиқ» амалдорларни ҳам тизимдан тозалаш керак деб ҳисоблашмоқда. Улар бу шахслар фақат ўз манфаатларини ўйлаётгани ва университет тақдири ҳеч кимни қизиқтирмаётганидан шикоят қилмоқда.

Ҳозирча вазирлик ва тегишли органлар бу масала юзасидан расмий муносабат билдирмаган.