«Халқ дарди» талаби билан Элтузнинг яна бир канали ёпилди

Жорий йилнинг 7 октябр куни эрталаб навбатдаги огоҳлантириш ортидан Ютубдаги  Eltuz-25 каналининг ёпилгани маълум бўлди. Бу олдинги канал ўрнида бир неча ой аввал очилган эди.

Авторлик даъвоси билан чиққан шахс «Тashqi ushlar vazirligidan munodabat kutib qolamiz» дея номланган видеодан олинган 26 секундлик парча юзасидан 5 октябр куни шикоят қилган.

Бундан бир неча ой аввал аввал тармоқда тарқалган видеода ўзбек таксистининг рус миллатчиси таҳқирлангани акс этган ва Элтуз бу қисқа рилзни, Россиядаги миллатчиликка эътибор қаратиш мақсадида эълон қилган эди. 

5 октябр кунидан Элтузнинг ютуб каналида 90 кунлик тақиқ жорий этилди.

Албатта шу куниёқ бу видео олиб ташланди, қоидага кўра Элтуз «автор» билан боғланиб ундан стрейкни олиб ташлашни илтимос қилди.

«Биз бу қисқа рилзни даромад кўриш учун эмас, шунчаки Россиядаги миллатчиликка эътибор қаратиш мақсадида эълон қилганмиз. Бу юзадан Ўзбекистон Ташқи ишлар вазирлиги Россияга нота юборган ва хозир бу видео бизнинг каналимиздан олиб ташланган. 

Сиздан илтимос стрейкни қайтиб олинг. Бу биз учун ҳам, ўзбек жамияти учун ҳам муҳимдир.» дея билдирилган эди 5 октябр кунги Элтуз муҳаррир йўллаган мактубда. 

Бироқ «Халқ дарди» дея аталган ютуб канали эгаси ([email protected] ) Элтузнинг шу мазмундаги хатига жавобан ўзининг кейинги ниятини қуйидагича баён қилди:

Ассалом алекум ҳурматли  Қудрат Бобожонов!

Мен сизни ушбу видео масаласида огоҳлантириб, телеграм ботингизга хабар ёзганман, лекин сиз эътиборсиз қолдирдингиз. Мен бу жараённи менсимаслик деб қабул қилдим ва қонуний йўл тутдим. Сиздан яна битта талабим бор, You Tube каналингизга 3 сентабр куни жойлаган «Ўзбекистон ТИВ Россияга яна бир нота юборди» номли видеода ҳам менинг видеомдаги кадрлар акс эттирилган, сизга талаб, шу видеони ҳам кананлингиздан ўчиринг ёки қонуний йўл тутиб иккинчи страйкни олишингизга ёрдам бераман. Агар видеони ўчирсангиз, ҳозирги страйкни қайтариб оламан. Бу сизга тахдид эмас, огоҳлантириш. You Tube қоидаларини жуда яхши тушунадиган мутахассислигимни эслатиб ўтаман. 

Лекин қизиғи бу хат Элтузга бир кун ўтиб, октябр куни Ютуб канал тўлиқ ўчирилганидан кейин соат 9.40 да жўнатилаяпти. Бироқ Элтуз муҳаррири Қудрат Бобожон бу мактубга қуйидаги жавобни ёзишни маъқул кўрди:

«Видео олиб ташланган. Телеграм боти ва у ердаги материаллар учун мен жавоб бермайман. Ботга ёзиш керакмас эди. Агар чиндан ҳам ёрдам бермоқчи бўлсангиз стрейкни олиб ташланг. Мен билан боғланинг, чунки бу иш билан кейинчалик Швед полицияси шуғулланади. Россия миллатчилигига оид видео муаллифи ҳақиқатан ҳам сиз бўлсангиз албатта».

Масаланинг бошқа томони ўзини «YouTube қоидаларини жуда яхши тушунадиган мутахассис» дея таърифлаётган шахснинг ниятида. Ҳақиқатан ҳам бу одам каналини Халқ дардини тинглаш учун очган бўлса эди Элтуз каналини ёпишга бунча тиришмаган бўлар эди.  Унинг чиндан ҳам «миллатчилик кўриниши акс этган» видео муаллифи экани ҳам савол остида.

(Олиб ташланган видеодан скриншот: Видеода рус миллатчиси ўзбек мигрантини «Сен русларнинг қулисан!» дея ҳақорат қилаётгани акс этган)