Чумчуқдан қўрққан тариқ экмайди

«Эл нетиб топгай мениким, мен ўзимни топмасам…»

Бу гапларни кўпчилик учун эмас Ютубдан мени излаб топган энг садоқатли обуначиларим, яқин дўстларим учун ёзаяпман. Менинг бугунги кайфиятимни акс эттирувчи Алишер Навоийнинг юқоридаги сатрлари эса бир вақтлар, тўғрироғи 1988 йили ўзбек оппозициясининг илк нашри бўлган «Бирлик» учун шиор бўлган эди. Нега буни эсладим. Чунки мен бугун тармоқдаги аккаунтим атрофида бир неча йилдан бери тинимсиз давом этаётган таъқибу тазйиқлар оқибатида нафақат элни – аудиториямни, балки ўзимни ҳам мутлақо ўзини йўқотиб қўйгандай ҳис қилдим. Йил бошида ютуб каналига ҳужум қилинган (кибер-порно) ҳужумдан сўнг 750 минг обуначидан айрилдим.

Кейин эса ғоз туриб, тролларнинг гуррос қарғишию маломати остида ютубда бошлаганим кейинги каналим ҳам 22 мингга етиши билан тўхтатилди. Бунинг сабабини Ютуб «янги канал эгаси ўша олдин ҳуқуқбузарликни қилган шахс экани» билан изоҳлаган. Мени бадном қилишни истаганлар учун яна байрам бошланди.

Кўпчилик мени йўқотиб қўйди, яна бир кўпчилик балодан нари дея секин атрофимдан узоқлашишди. Ҳудди ўша машҳур рус нигилистларидан бири, (адашмасам Писарев ёки Белинский) Айтганидек: «Агар бизнинг хира бу шамимиз атроф жонибни етарлича ёритмаётган бўлса ортиқча мой сарфламай уни ўзимиз ўчирганимиз маъқул эмасми?»

Сўннги ҳолатларда айтишим жоиз ҳеч бир аккаунтимни ўзим ўчирмаганман. Болалар порноси деган нарсага эса илк бор 2025 йилнинг февралида кўзим тушди… Кошки кўрмасайдим. Кейин эса билишимча бу эркин фикрни йўқ қилишни истаётган режимнинг асосий қуролларидан бири экан. Олдин хакерлик йўли билан аккаунт бузилади ва у ерга ўттиздан ортиқ Ютуб қоидаларини бузувчи контентлар юкланади. Шу билан тамом сиз жиноятчисиз ва каналингиз ёпилади.

Лекин мен ўзбекнинг «Кўр ҳассасини бир марта йўқотади!» деган мақолига амал қилиб индамай кетадиган эмас эдим. Ортимдаги ёндирилган қанча кўприклар, йўқотилган хассаю қилинган хатолар бунга гувоҳ. Шунинг учун анча илгари очилган, бироқ видео қўйилмагани учун ҳеч ким обуна бўлмаган каналимда секин иш бошладим… Мақсад, энди мутлақо тескари бир мақолга амал қилиб чумчуқлар учун тариқ экиш. Кейинги сатр каналимга кирган 67-нчи обуначи учун бўлади… Мени тушунгандирсиз азиз ўқувчим.

Қудрат Бобожон