Шерободлик блогер босимга учраганини билдирди

Шерободлик блогер Шоҳжаҳон Жамолов ички ишлар ходимлари унга нисбатан босим ўтказгани ва асоссиз ушлаб турганини маълум қилди.

Шоҳжаҳон Жамоловнинг айтишича, ички ишлар ходимлари уни Шеробод тумани ички ишлар бўлимига асоссиз олиб борилиб, маълум вақт ушлаб турганлар. Блогер бу ҳолатни фуқаро сифатидаги ҳуқуқларининг бузилиши, деб баҳоламоқда.

Шоҳжаҳон Жамолов блогер сифатида жамоатчилик муаммоларини ёритиб келаётгани ва қонун доирасидан чиқмаганини таъкидлаган.

У ушбу ҳолат юзасидан адолатли ва холис текширув ўтказилишини ҳамда ўзига нисбатан бўлаётган тазйиқларга барҳам берилишини сўраб, Президентга мурожаат қилган.

Ҳозирча мазкур ҳолат бўйича мутасадди идоралар расмий изоҳ бергани йўқ.