Ўзбекистонда мустақил ОАВ ва контент-мейкерларнинг Instagram аккаунтлари оммавий равишда ўчирилди

31 январга ўтар кечаси Instagram мустақил ХУК нашри аккаунтини “Ҳамжамият қоидаларини бузиш” сабаби билан деактивация қилди. Шу билан бирга нашрнинг шеф-редактори Яна Моделовага тегишли боғлиқ аккаунт, шунингдек sarpa.media нашри ва экоблогер Мутабар Хушвактованинг профиллари ҳам блокланди.

Таҳририят маълумотларига кўра, Instagram қўллаб-қувватлаш хизмати аниқ қайси қоидалар бузилгани ҳақида батафсил изоҳ бермаган. Ҳозирча  ХУК аккаунти деактивация қилинган ҳолатда қолмоқда. Яна Моделованинг аккаунтини тиклашга муваффақ бўлинган, аммо айни пайтда у Instagram’да тўғридан-тўғри қидирув орқали чиқмайди.

Жабр кўрган нашрлар ва муаллифлар бу ҳолатни Ўзбекистонда ижтимоий аҳамиятга эга масалаларни ёритиб келаётган мустақил ОАВ ва контент яратувчиларга қарши мувофиқлаштирилган ҳужум бўлиши мумкин, деб ҳисобламоқда. Хусусан, гап Чорвоқда Sea Breeze қурилишига оид материаллар ҳақида бормоқда.

Журналистлар фикрича, бундай ҳужумлар учун бот-фермалар ва сунъий трафикдан фойдаланилади: қисқа вақт ичида саҳифаларга оммавий равишда сохта аккаунтлар обуна бўлади, сайтларга эса нашр мавзуси билан боғлиқ бўлмаган давлатлардан шубҳали трафик кела бошлайди. Бу эса ижтимоий тармоқлар алгоритмлари томонидан автоматик санкцияларга олиб келиши мумкин.

ХУК таҳририяти аккаунтга кириш ҳуқуқини тиклаш учун барча мавжуд механизмларни ишга солишини маълум қилди, бироқ янги профиль очиш эҳтимолини ҳам истисно этмаяпти. Журналистлар содир бўлган воқеани сўз эркинлигига, ахборот тарқатиш эркинлигига ва мустақил ОАВ фаолиятига тажовуз сифатида баҳоламоқда.29 январ куни  Элтуз телеграм канали  хам ëпиб қўйилган эди.

Исми номаълум қолишини истаган Элтуз журналистларининг айтишича¸ канал «танқидий материаллар ортидан хужумга учраган»

Ушбу ҳолат медиа жамоатчилиги орасида жиддий хавотир уйғотди ва рақамли маконда журналистлар ҳамда контент-мейкерларни ҳимоя қилиш масаласини яна бир бор кун тартибига олиб чиқди.