Нега Элтузнинг ютуб каналидаги айрим видеолар рус тилида?

Нима учун кунора рус тилида видео қилаяпсизлар, улар ўзбекчани тушунмаса, шу юртда туғилиб, 30 йил 50 йил яшаб ўзбек тилини ўрганмаган бўлса нега уларга бундай комфорт яратаяпсизлар деган ҳақли саволлар туғилаяпти, қисқа жавоб беришга ҳаракат қиламан. Биринчидан рус тилида гапирувчилар Элтуз аудиториясининг бир қисми. Улар миллатидан қатъий назар видеода келтирилган муаммоларга ва уларнинг ечимига тааллуқли шахслар бўлиши мумкин ва бу уларнинг саводсизлигидан кўра муҳимроқ. Иккинчидан маълум фоиз кўрарманлар ер куррасининг умуман бошқа нуқталарида яшайди ва бошқа тилларда гаплашишади. Ютуб тизимидаги рус тили автоматик таржимага кўпроқ такомиллаштирилган, ўзбек тилида қилинаётган материалларда бу нарса анча оқсаб қолган. Бу эса на ўзбек жамиятининг, на ҳукуматининг давлат тилини ривожлантиришга ҳеч ҳаракат қилмаётганини англатади. Учинчи бир муҳим сабабни мен яқинда англадим, рус тилининг ўзбек сегментида гипнотик таъсири. Бу Ўзбекистонда ва Россияда боқилаётган беҳисоб тролларнинг ҳам тили экани. Бу дегани қулнинг ҳўжайини гаплашадиган тил экани. Ҳеч аҳамият қилдингизми, ўзбек тилида материал қўйилса камроқ негатив ва ҳақоратли изоҳ қолдиришади. Демак биз ютубда рус тилида материал чиқарганимизда ҳақоратлар ёмғири озгина тинганини кузатамиз, келгуси видеога қадар озроқ дам оламиз!

Элтуз муҳаррири ва ютюбери 

Қудрат Бобожон