Вақт машинаси: 19 декабр – Тошкентда коррупцияни ифодаловчи қўл ҳайкали ўрнатилди

2023 йил 19 декабр куни Тошкентда коррупцияга қарши курашни ифодаловчи қўл кўринишидаги инсталяция монументининг очилиш маросими бўлиб ўтди.

Маросимда Ўзбекистон президенти Шавкат Мирзиёев ва Қатар амири шайх Тамим бин Ҳамад Ол Соний иштирок этди.

«Кафти очиқ қўл кўринишида металлдан ишланган ушбу ўн икки метрлик композиция ҳалоллик, пок амал ва ниятларни, коррупцияга нисбатан мутлақ тоқатсизликни, дунёнинг барча мамлакатларини унга қарши курашишда бирлашишга чақириқни англатади» дейилади расмий хабарда.

Эслатиб ўтамиз, маросимдан бир неча кун аввал Қатар амири 2016 йили ўзи таъсис этган Коррупцияга қарши кураш бўйича халқаро мукофот билан Ўзбекистон президенти Шавкат Мирзиёевни тақдирлаган эди.

Тошкентда ўрнатилган монумент эса оригинал асар бўлмай балки Қатар амири таъсис этган мукофот – «очиқ кафт»нинг айни катталаштирилган нусхасидир.

Айни мукофот таъсис этилган 2016 йили Элсевар тахаллуси билан Элтуз нашри учун карикатуралар чизиб берган рассом Музаффар Музаффар (Туробов) Ўзбекистондаги коррупцияни чўзилган ҳар тарафдан чўзилган очиқ кафтлар тарзида акс эттирган эди.