Хоразмдаги мустақил ALC телекомпанияси Каримовнинг сиëсий қарори билан ëпилган

Таниқли публицист ва собиқ депутат Карим Баҳриев деярли икки ярим соат давом этган Лолазор подкасти охирида Ислом Каримов давридаги цензура ҳақида сўз юритиб, қарийб 25 йил ўзбек матбуоти учун тақиқда бўлган мавзу Урганчдаги Эй Эл Си телекомпаниясининг ёпилиши ҳақида илк бор гапирди.

«Ака ука Шуҳрат Бобожоновларнинг чет элга чиқиб кетишларига сабаб уларнинг ALC телевидениеси самолётнинг портлаганини кўрсатгани бўлган-да энди. Урганчда самолет қулаган. Буни кўрсатиш мумкин бўлмаган. «Ўзбекистон Ҳаво йўллари»нинг сертификати бўлган, энг ҳавфсиз компания деган. Бунақа хабарлар УзАга келарди. Олдин ЎзАнинг тексти чиқиши керак эди. Қандай талқин қилиш, кимни айбдор қилиш керак? Булар съемка қилишганда берворишган Эй Эл Си дан энди. У пайтдаги цензура сабаб олдин УзАдан чиқмаса, ҳақ сўзни чиқара олмасди. Шундан сўнг булар чет элга кетиб қолишди. Бирови «Озодлик», бирови «Элтуз» қилиб кун кўриб юришибди. Буларнинг кетишига шу сабаб бўлган» деди Карим Баҳриев «Лолазор» подкастидаги кўрсатувда.

1994 йили Урганч шаҳрида Шуҳрат, Ғайрат ва Қудрат Бобожоновлар мустақил мустақил телестудия ташкил этишган эди. Аслида очилган кунидан буён уни тугатишга ҳокимият амалдорлари томонидан кўплаб уринишлар бўлган ва ALC мустақил телекомпанияси ташкил топганидан беш йил ўтиб тугатилган.