Муз кўчди: «Тинчлик битими шартлари сони энди 28 та эмас»

Зеленский тинчлик келишуви ижобий томонга ўзгартирилигани ҳақида билдирди: «Женевадаги музокаралардан сўнг бандлар сони энди 28 та эмас — унга кўплаб тўғри жиҳатлар киритилган» деди Украина президенти.

У шунингдек Киев олдида ҳали мураккаб иш турганини, якуний ҳужжатни тайёрлаш учун барчасини муносиб тарзда амалга ошириш зарурлигини тушунтирди.

Владимир Зеленский, тағин, барча энг нозик масалаларни шахсан Трамп билан муҳокама қилишини маълум қилди ва Украина ҳеч қачон тинчлик йўлида тўсиқ бўлмаслигини таъкидлади.

Айни пайтда, Украина Ташқи ишлар вазирининг биринчи ўринбосари Сергей Кислица Financial Times нашрига берган интервьюсида Женевадаги музокаралар бошланишидан аввал деярли барбод бўлаёзгани ва вазият «қил устида тургани» ҳақида хабар берди.

Америка томони «тинчлик режаси» тафсилотларининг ОАВга сизиб чиқиши ва ушбу лойиҳанинг оммавий муҳокамасидан ғазабланган эди. Кислицанинг сўзларига кўра, салкам икки соат давом этган музокаралардан сўнггина тарангликни юмшатиш ва мулоқотни конструктив ўзанга қайтаришга муваффақ бўлинган.