مواليد يناير وعواجيزها
عمال مصنع سيراميكا كليوباترا في السويس خالفوا أوامر الهتاف للنظام و طلبوا برحيله...اكتر من ٥٠٠ شخص اتقبض عليهم جمعة و سبت و بتتوجهلهم تهم نشر أخبار كاذبة و الانضمام لجماعة محظورة! محاولات واضحة لحجب التواصل الاجتماعي و بعض القنوات الإخبارية...السويس تقريبا كلها بيتقبض عليها و فيه ناس لسة بتنظر في فكرة ثورة ولا انقلاب و هل الليلة كدة اتلمت ولا بتبدأ و هل محمد علي له ضهر ولا الاوحش لو مالوش!
انا اتعودت من كام سنة كدة و خدوها مزايدة بس هو فعلا قرار واخداه اني مركبش موجة ترند على الفيسبوك ولا اتكلم الا في اللي انا حساه و شايفاه و ايدي فيه.. مش لازم ادلو بدلوي في كل كبيرة و صغيرة و كل نظرية مؤامرة ادفس فيها و اغذيها...الناس المصطنعة كتير و حقيقي السنين اللي فاتت اظهرولنا زيف ياما...اذن الفيسبوك عندي مساحة متابعة و تواصل و تشبيك لكن مش مكان لإثبات الذات الثورية عشان الثورة في الشارع حتى و هي مكسورة مش منتصرة على فكرة...في وقت بتقضيه تغير حد و تعلم حد و تلهم حد...
عشان كدة انا بتقفل جدا من بوستات الرفاق اللي فيها افورة في اليأس زي ما بتقفل من بوستات اللي بيزيط جامد....عارفين ليه؟ عشان فيه شباب صغير شايف نفسه من مواليد يناير و شايفنا حاجة كبيرة لسة و شايف أن التغيير حصل فعلا و الدليل هو نفسه!!!!!!! الشباب ده بيوجعه موقفنا من نفسنا و مع اني من المؤمنين بأن السخرية من أهم وانضج الحيل الدفاعية و انها ممكن فعلا تسقط أنظمة إلا أن السخرية من النفس لما بتزيد بنوصل لحاجة اسمها سحق الذات self defeat و كمان learned helplessness يعني قلة الحيلة المتعلمة...الحاجتين دول بيغذوا اليأس اللي بيغذي الهزيمة فنعيش أجواء النكسة معتقدين اننا متعايشين الا اننا مسحوقين و بإيدينا...انا والله عارفة
اننا فعلا مُنتهكين و مهددين و معظمنا معتقل و منفي و اللي باقي مننا بيحاول يتعافى و ده وضعنا و محدش يقدر يقولنا محاولناش بس لحد نفسنا و حلو اوي..إنما نطرطش على اللي لسة ميأسش ده بقى مزعج و قفيل ..زي ما احنا
مش عايزين مسئولية أن حد بسببنا ينزل و يتاخد و خايفين على حريته و بنعامله بدون أهلية (و ده من شعورنا العالي بالذنب و المسئولية مش من تقليلنا من حد) ليه مش خايفين نكون احنا المسئولين عن يأسه و اكتئابه؟ ليه فقدنااحساسنا بالأرض و مركزين هنا نكلم بعض و يا ريته كلام علمي أو جدلي لا ده معظمه يا يأس زايد و فعلا مناخ تشاؤمي يا اي مزايدة و جعجعة على أو مع أي رأي...
هاتفرق ايه صراع أجهزة ولا قرصة ودن؟ مادام احنا مش شايفين الناس نفسهم فرصتنا و أن أي حراك احسن من الركود و أن أي حراك فيه فرصة حقيقية يا نقتنصها صح يا تضيع!!!! فاكرة كويس #كاذبون قدرت تنزل ناس ياما يناير ٢٠١٢ هتفوا ضد حكم العسكر و ضد احتفالات الإخوان بالثورة لكن القوة المدنية المنتظمة مقدرتش تستغل الحراك ده لتحقيق مطالبها و الناس روحت بدون ما حد يطلب منهم حاجة و مع الوقت انعزلنا في صراعاتنا....
مش غلط أبدأ نضم على ناس بمطالبنا احنا مادام احنا في وضع مهزوم...ولو مش عايزين نضم بلاش نضم و خلينا قاعدين لحد ما نحس الفرصة أو المشهد بس الغلط اني احبط تحركهم أو توسعه بأداء انهزامي في الاتجاهين و انا على الكنبة بعد ما انا اللي كنت شاهد على يوم ميلادهم...
هيحصل ايه لو نسكت لحد ما نفهم و هيحصل ايه لو استخدمنا طاقتنا في بلورة مطالب أو حتى نشارك اللي نازل خبراتتا السابقة...ما هو احنا حقوقيا فاعلين ومش بنسيب حد اتمسك يبقى ليه على المستوى الحقوقي اشيلك و اجري عليك لكن على المستوى السياسي هحبطك؟؟؟ ما هو احنا كمان لسة بنتحبس و احنا وضعنا الكنبة يبقى مادام بحاسب و هفضل احاسب كدة كدة ليه مطلبش مشاريب وسط الناس؟ ماشي معندناش قدرة نقدم غير دعم حقوقي كلنا يبقى خلينا منحصرين فللي نقدر نقدمه و بلاش نضر على الأقل مادام ده وضعنا..كلمة عواجيز يناير شرف مش شتيمة على فكرة عشان مش كوننا من عواجيز يناير يبقى نعمل زي عواجيز الفرح...ممكن نكون رفيق اكبر للاصغر اللي قالنا ياما أنه اتولد وقت ما كنا احنا بنخلق #فرصة!!!! ممكن نكون حكماء عادي ما هو احنا برضو ماتعلمناش ببلاش...ب الحكماء بيكونوا قدوة و مثل و مصدر إلهام حتى لو شاركوا اخطائهم عشان اللي جاي يتفاداها مش بيكونوا معرقل لطريق اللي مكمل رحلته! اومال يعني ايه اجيال بتسلم اجيال و الثورة مستمرة و مكملة؟
