نضال مع نص مليون بنت..فضحوا متحرش
التحرش الجنسي في مصر بقى روتين يومي وللأسف بقى شيء معتاد إن متحرش يتحرش ببنت أو ست وطبعا الاماكن اللي بيحصل فيها التحرش كتير بداية من البيت والشغل والمصالح الحكومية ..الخ لكن من أكتر الأماكن اللي بيحصل فيها تحرش بالبنات والستات هي المواصلات اعامة يعني ممكن في أتوبيس تلاقي في تاكسي تلاقي حتى في اوبر وكريم برضوا تلقي مشاء الله منتشرين زي النمل وطبعا كل البنات عارفين أدوات وأساليب المتحرشين ومنها مثلا يعمل إنه بيطلع الفلوس من جيبه ويلزق إيده في جنبك وانتي قاعدة أو تلاقيه فاتح رجليه على مصرعيهم ولا كأنه فاتح باب زويلة ولازق في رجليكي أو يحط ولمؤخذة إيده ويحسس على جسمك أو يقف وراكي في الاتوبيس او حتي يعدي ويلمسك من ورا وأشكال كتير بتعدي علينا كل يوم وبالنسبة لاعار المتحرشين فحدث ولا حرج فممكن تلاقي متحرش شاب في العشرينات أو التلاتينات وممكن حتى تلاقي متحرش من سن جدو يعني الستينات او السبعينات والله ما بتفرق في التحرش هتلاقي كل الاعمار طب عارفين والله العظيم في اطفال في ابتدائي بتتحرش ببنات وممكن البنت تكون أكبر منه على فكرة الكلام دة مش من وقع خيالي لا خالص دة من واقعنا هنا في المحروسة ام الدنيا في مصر فمش غريب ابدا لما نلاقي مصر محتلة المرتبة الثانية في نسب التحرش عالميا هتلاقيه شيئ عادي وهتلاقي اللي يقولك أصل إحنا 100 مليون يا جماعة فأي حاجة هتحصل هتطلع منها نسب عالية طب يا سيدي نورت المحكمة
دي أساليب المتحرشين طيب هل البنات بتسكت لما بتتعرض للتحرش؟ اسمحولي أقولكم انه في الحقيقة اة في بنات بتسكت أولا لأنها ممكن تكون خايفة أو مش عارفة تتصرف ف الموقف أو لأنها عارفة إن محدش هيقف جنبها وكمان في بنات تانية ممكن متسكتش وتطلع دبوس من الطرحة وتشكه بيه أو تقوله حاسب ايدك أو إنها مثلا تشتمه وتبهدله وممكن تستنجد بالناس اللي هما في الحقيقة في أغلب المواقف اذا مكانش كلها بيعملوا من بنها ولا كأنهم سامعين ولا شايفين حاجة المهم نرجع تاني للمتحرشين اللي في كل حتة منتشريين المتحرش بتاعنا المرادي إختار الميكروباص عشان يتحرش ببنت فياترى إتحرش بيها إزاي قالها كلمة خارجة مثلا لا محصلش بصلها بصة يعاقب عليها القانون ؟ لا محصلش طب عمل إيه ؟ الاستاذ المتحرش عدى كل التوقعات يا فندم دة لمؤخذة فتح سوستة البنطلون بتاعه هو قاعد جنب البنت وطلع عضوه الذكري ومارس العادة السرية قدامها مستغربين؟ ل متستغربوش هو عمل كدة فعلا وطبعا البنت لو قالت كدة وإستنجدت بحد محدش هيصدقها لأن الكل هايقولها حرام عليكي هو عملك حاجة البنت قررت تصوره مش عشان عاجبها اللي كان بيعمله أو مستمتعة بيه لا ابدا يا بيه البنت صورته عشان تفضحه وتاخد حقها في البيئة الأمنة وحقها في إنها تكون مش خايفة ومش قلقانة وهي راكبة مواصلات عشان تروح كليتها على فكرة البنت اسمها نضال وفي كلية فنون جميلة يعني إنسانة حساسة وفنانة وعلى فكرة نضال دة مش بس إسمها نضال دة كمان فعلها لأنها نضالت لحد ما قدرت تستجمع قواها وتقدر تطلع التليفون من الشنطة وتصوره مش صورة بس لا صورته فيديو كمان عشان محدش يقول دي صرة تركيب وإحتفظت بالفيديو وبدأت تفكر هاجيب معلومات أو بيانات المتحرش دة إزاي ومكانش قدامها غير دندشة متشتغربوش من الإسم دندشة دة جروب بنات على الفيس بوك موجود فيه نص مليون بنت وفيه كل حاجة خاصة بالبنات ميكياج تلاقي لبس تلاقي خروجات تلاقي نصايح للبشرة والشعر تلاقي نصايح للزوجة للإحتفاظ بزوجها تلاقي خناقات بين الأعضاء برضوا تلاقي وساعات كتير بيختلفوا مع بعض ماهو حضرتك كل واحدة في الجروب أكيد لها معتقداتها افكارها واكيد ممكن يختلفوا ودة بتلاقيه كتير في جروب دندشة دول نص مليون بنت بس للأمانة الحاجة الوحيدة اللي بيتفقوا عليها هي إنهم يقفوا جنب أي بنت او ست تعرضت لموقف وحش وبيحاولوا بكل الطرق إنهم يحلوا مشكلتها او يجيبولها حقها ونضال من حظها إنها عضوة في الجروب من 7 سنين تقريبا وبتابع الجروب زينا كلنا اة زينا كلنا أه نسيت اقولكم إن إنا كمان عضوة في الجروب
المهم نضال عرفت هتعمل إيه عشان تجيب بيانات المتحرش طبعا بما إنها عضوة في جروب فيه نص مليون بنت وكلهم بيحبوا يوجبوا مع بعض اكيد هتلاقي إللي يساعدها ويجيبلها بيانات المتحرش من صورته وهيعملوا دة حتى من غير ما تطلب المهم قررت نضال تنزل صورة وفيديو للمتحرش وهو قاعد جنبها بيتحرش بيها وبعد ما نزلت صورة والفيديو للمتحرش على الجروب وعينك ما تشوف إلا النور حضرتك خلية نحل وإشتغلت تقولش المخابرات المصرية أيام رأفت الهجان وجمعة الشوان ومهديوش غير لما جابوا كل بيناته وبيانات أصحابه دة حتى صفحة الفيس بوك بتاعته جابوها وجابوا بيانات أهله دة حتى خطيبته جابوا بياناتها كل دة في يوم يا فندم وطبعا نضال أخدت البيانات والفيديو وراحت عملت محضر وأدت لوكيل النيابة بياناته طبعا ...وهي بيتحقق معاها وكيل النيابة بيقولها عرفتي منين كل التفاصيل دي عنه قالتله جروب دندشة قالها لا دول يشتغلوا معانا بقا وأنا من هنا بضم صوتي لصوت وكيل النيابة صدقني بنات دندشة دول هيعملوا شغل أحسن من اللي بتعمله وحدة مناهضة العنف ضد المرأة اللي موجودة في بعض أقسام الشرطة المهم المتحرش أخد 4 ايام علي ذمه التحقيق والتحقيقات مستمرة ومنتظرين موعد الجلسة عشان نشوف حكم القضاء هايكون عامل ازاي طيب المتحرش وإتفضح بين الناس وبين أهله وأصحابه وخطيبته وإتقيض عليه وبيتحقق معاه طيب منستوش حاجة؟ نضال يا جماعة البنت اللي حصل معاها الموقف دة حالتها عاملة إزاي دلوقتي وكانت عاملة إزاي أثناء بعد الموقف دة هي كتبت بوست على جروب دندشة بعد الموقف ب 3 أيام وكانت بتكلم فيه بنات دندشة وقالت فيه الاتي
عايزاكم تنصحوني
انهارده تالت يوم ليا ف السرير مبتحركش ولا عندي طاقة اتحرك نهائي
انهارده تالت يوم ليا من غير اكل ولا شرب نهائي
نفسيتي تحت الصفر بكتيرررر وتعبت وزهقت
مش مستعدة اسمع اي سيرة عن الحيوان ده تاني ولا حد يسالني ع الموضوع تاني
مش عايزه أشوف رأي ضدي من واحدة متعرفش حق ربنا او متعرفش الحوار من اوله
واي واحدة اتبلت عليا او غلطت ف حقي ف مش هقولك غير حسبي الله ونعم الوكيل فيكي ربنا يردلي حقي دنيا وأخرة
عندي امتحانات ومشاريع وهم ما يتلم مخلصتش اي حاجه
بكرة المفروض أسلم 4 مشاريع معملتش ولا واحد منهم ومش قادرة أشتغل نهائي
كل مابتحرك أو اقوم اتعب جدااااا
إنصحوني أعمل ايه يصلح من نفسيتي شوية ويقويني ويخليني أرجع أشتغل وأرجع لحياتي من تاني بشكل طبيعي وبنفسية سليمة
الناس اللي دارسة علم نفس تنصحني برضو نصيحة تنفع للي مريت بيه دة كله
والناس اللي بتقولي شوفي حالك تقولي ازاااي أنا نفسيا مدمرة
قولولي طرق أعالج بيها نفسيتي عشان أقدر أشوف حالي وأكمل طريقي
دة كان كلام نضال بعد موقف التحرش اللي اتعرضتله
من المهم جدا اننا كمان نقدم الدعم النفسي بجانب الدعم القانوني للناجيات لان أكيد التأثير النفسي من موقف زي دة بيكون له تبعات سيئة جدا على الناجية وفي مصر مؤسسات نسوية كتير بتقدم الدعم النفسي والقانوني للناجيات من العنف ...إدعموا نضال وإدعموا نضال كل بنت ضد التحرش
