▪︎ငါးရက်အတွင်းတိုက်ပွဲများ၌ စစ်ကောင်စီမှ ၅ဦးသေဆုံးကာ အရာရှိများလည်း ဒဏ်ရာရ
ကရင်ပြည်နယ် မြ၀တီမြို့အနီးတွင် ယနေ့ မနက်က တိုက်ပွဲဆက်လက်ဖြစ်ပွားခဲ့ပြီး စစ်ကောင်စီတပ်မှ (၂)ဦးသေ၊ (၃)ဦး ဒဏ်ရာရခဲ့ကြောင်းကရင်အမျိုးသာလွတ်မြောက်ရေးတပ်မတော်(KNLA) ပူးပေါင်းစစ်ကြောင်းဖြစ်သည့် ကော်ဘရာ စစ်ကြောင်းက သတင်းထုတ်ပြန်သည်။
ဇူလိုင် ၉ရက် နံနက် ၁၀နာရီခန့်တွင် မြ၀တီမြို့အနီးလက်ခတ်တောင်ဒေသ၌ ရင်ဆိုင်တိုက်ပွဲဖြစ်ပွားခဲ့သည်ဟုဆိုသည်။စစ်ကောင်စီတပ်ကို တပ်မဟာ(၆) KNU/KNLA၊ ကော်ဘရာစစ်ကြောင်း(၁)၊ကျားသစ်နက်၊Federal Wingsတို့ ပူးပေါင်းတိုက်ခိုက်ခဲ့ခြင်းဖြစ်သည်ဟု ဖော်ပြသည်။
အဆိုပါတိုက်ပွဲ၌ တော်လှန်ရေးပူးပေါင်းတပ်မှ ထိခိုက်မှုမရှိဟုလည်း သိရသည်။
မြ၀တီမြို့အနီးတွင် ဇူလိုင် ၅ရက်မှစ၍ တိုက်ပွဲများဖြစ်ပွားခဲ့ရာ စစ်ကောင်စီတပ်က ထိခိုက်သေဆုံးသူများရှိခဲ့ပြီး ဒဏ်ရာရသူများထဲတွင်လည်း အရာရှိများပါဝင်ခဲ့သည်။
ကော်ဘရာစစ်ကြောင်း၏ ဇူလိုင် ၇ရက် သတင်းထုတ်ပြန်ချက်တွင် မြ၀တီမြို့ စိမ်းလဲ့မြို့အနီး တွင် ဇူလိုင် ၅ရက်မှစ၍ စစ်ကောင်စီတပ်က စစ်ကြောင်းထိုးရန် ကြိုးစားကာ လက်နက်ကြီး ပစ်ကူများဖြင့် ပစ်ခတ်၍ ၂ရက်ကြာ တိုက်ပွဲဖြစ်ပွားခဲ့သည်ဟု အသိပေးထားသည်။
အဆိုပါတိုက်ပွဲတွင်လည်း ရန်သူဘက်မှ ၃ဦးသေဆုံးကာ ခမရ (၁၁၈)မှ ဗိုလ်မှူး တစ်ဦး ၊ ဗိုလ်ကြီးတစ်ဦး အပါအဝင် ၅ ဦးဒဏ်ရာရခဲ့သည်ဟု ထုတ်ပြန်ထားသည်။
ယင်းတိုက်ပွဲ၌ တော်လှန်ရေးပူးပေါင်းတပ်မှ ရဲဘော် ၁ဦး ဒဏ်ရာရခဲ့ပြီး ဒရုန်းတစ်စီး သေနတ်တစ်လက် ပျက်စီးဆုံးရှုံးခဲ့ရကြောင်း ကော်ဘရာ စစ်ကြောင်းက ထုတ်ပြန်ထားသည်။
