ပဲခူးတိုင်း၊ ဒိုက်ဦးထောင် (ကျိုက်စကော) ကနေ ထောင်ပြောင်းရွှေ့ချိန် သတ်ဖြတ်ခံရသူ နိုင်ငံရေးအကျဉ်းသားဦးရေဟာ ၁၂ ဦးထိရှိလာပြီလို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများ ကွန်ရက်က ဒီနေ့မှာ ထုတ်ပြန်ပါတယ်။
သတ်ဖြတ်ခံရသူ ၁၂ ဦးအနက် ၁၀ ဦး ရဲ့သတင်းကို မိသားစုနဲ့နီးစပ်သူတွေထံက အတည်ပြုနိုင်ထားပြီး ကျန်တဲ့၂ ဦး သတင်းလည်း ထပ်မံ အတည်ပြုနိုင်ဖို့ ကြိုးပမ်းနေတယ်လို့ဆိုပါတယ်။
ဒီနေ့ ဇူလိုင်လ ၂၇ ရက်ဟာ ဒိုက်ဦးထောင်ကနေ နိုင်ငံရေးအကျဉ်းသား ၃၇ဦး ထောင်ပြောင်းရွှေ့မယ်ဆိုပြီး ခေါ်ထုတ်ခံရတာ တစ်လပြည့်တဲ့နေ့လည်းဖြစ်ပါတယ်။
ပြီးခဲ့တဲ့ ဇွန်လ ၂၇ ရက်ညသန်းခေါင်ယံမှာ ဒိုက်ဦးထောင် အဆောင် (၁) နဲ့အဆောင် (၂) က နိုင်ငံရေးအကျဉ်းသား ၃၇ ဦးကို ထောင်ပြောင်းမယ်ဆိုပြီး ခေါ်ထုတ်ခံရတာလို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများ ကွန်ရက်က ထုတ်ပြန်ချက်မှာဖော်ပြပါတယ်။
အဲဒီနောက် ရက်သတ္တပတ်အကြာမှာတော့ သေဆုံးသူအချို့ရဲ့ မိသားစုတွေထံ အကျဉ်းထောင်ကအကြောင်းကြားစာပေးပို့တာတွေရှိခဲ့ပါတယ်။
စာထဲမှာ ထောင်ပြောင်းချိန် ကားမှောက်ရာမှာ ထွက်ပြေးလို့ ပစ်ခတ်ဖမ်းဆီးချိန် သေဆုံးသွားတာလို့ မိသားစုကို အကြောင်း ပြထားတာပါ။
သတ်ဖြတ်ခံရသူ ၁၂ ဦး ဟာ ကိုခန့်လင်းနိုင် ၊ ကိုပြည့်ဖြိုးဟိန်း ၊ ကိုရာလေး ၊ကိုဂျာကြီး ၊ကိုဇင်ဝင်းထွဋ် ၊ ကိုအောင်မျိုးသူ ၊ ကိုဘိုဘိုဝင်း ၊ကိုအာကာထက်ပိုင်မျိုး ၊ကိုအေးကို ၊ ကိုမင်းမျိုး၊ကိုဇီလောင်း ၊ ကိုမင်းဘုန်းမဟာတို့ဖြစ်တယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများ ကွန်ရက်က ထုတ်ပြန်ချက်မှာဖော်ပြပါတယ်။
အဲဒီ ၁၂ ဦးအနက် ကိုမင်းဘုန်းမဟာ နဲ့ ကိုဇီလောင်း တို့ သတင်းကို ထပ်မံအတည်ပြုနိုင်ဖို့ကြိုးပမ်းနေတယ်လို့ ဆိုထားပါတယ်။
စစ်ကောင်စီဘက်ကတော့ ဒိုက်ဦးထောင်ဖြစ်စဉ်နဲ့ပတ်သက်ပြီး သတင်းအမှောင်ချထားပါတယ်။
